Shillong, Kyllalyngkot 17: U National President ka NPP bad Myntri Rangbah ka Jylla Conrad K Sangma hynne ka sngi nyngkong, ula pyntip ba bun ki briew kiv la pynpaw ba ka ‘WE Card’ bad ka ‘MYE Card’ kadei tang ka Card Baki ne Card pynbieit election jongka TMC.
“Ka TMC kala kular bad bun ki briew ha ka thaiñ nongkyndong kiba la dep ban shim ïaka card bad dep rejistar, kila ong ba kadei ka Card shim lypa bad ai hadien (baki), kumta kadei tang ka jingkular election” ong u Conrad haba ïakren bad ki lad pathai khubor.
“Baroh ki seng saiñ pyrthei ki don ïa ka hok ban ai ïa ki jingkular hynrei kane ka sorkar jong ngi (MDA) kam shym kular hynrei ka pyni beit da ki kam” ula bynrap.
U Conrad ula ong “Ngi la trei ïa ki kam jong ngi, ngi la ai jingkyrshan ïa ki nongrep, ïa ki Self Help Group jong ki Kynthei bad ïa ki kynhun bapher jong ki samla bad wat hashwa ba ngin ai ka jingkular ne wat hashwa ba ngin kren eiei” ong u Myntri Rangbah ka jylla.
Ula ong, ka sorkar jylla kala pyni da ki kam bad kala kren da kaba shai kdar bad kaei kaba ka sorkar ka leh kam dei satia ka Card Sahram hynrei kadei kaba shisha kaba la jia ha kylleng ki jaka bad kumta ka FOCUS bad ka FOCUS Plus kidei kiba jia shisha, ha kaba palat 3 lak ngut ki nongrep kila ïoh jingmyntoi naka FOCUS bad FOCUS Plus.
Halor ka jingkynnoh pyrshah ka BJP ïa kitei ki skhim, u Mynti Rangbah ula ong, ba ïa kitei ki skhim la sdang ha u bnai Lber 2021 kaba la jan dap 2 snem bad lada ka dei namar ka jingthmu ha ka por elekshon, ka sorkar kala dei ban sdang ïa katei ka skhim ha kine ki khyndiat bnai.
“Kitei ki prokram kila ïaid mynta la jan 2 snem, kumta ki lah ban ong kat kum ka jingsngewbit ka jongki, hynrei na ka liang ka jong ngi, ngi sngew ba katei ka prokram kadei kaba kongsan bha na ka bynta ban wanrah ïaka jingkylla ha ka ïoh ka kot ha ki shnong ki thaw” ong u Conrad.
Ula ong katei ka prokram ka dei da ka jingthmu ban pynpoi sha kiba duk tam ha ka imlang sahlang bad kitei kidei ki kynhun, ki lah ban dei ki Producer Group, nongrep, ki briew kiba thaiñ jingthaiñ, kiba shna ïaki tiar ki tar, ne ka kynhun jong ki samla kiba pynmih ïaki soh ki pai haka Food Processing.
“Kumta kano kano ka kynhun kaba pynmih ïa kino kino ki mar ka lah ban ïoh ïa katei ka jingkyrshan bad ka jingthmu ban leh ïa katei ka dei ban ai jingkyrshan ïa ki kynhun bad ia ki riewshimet. Haba ngi mutdur lada ka don ka kynhun jong ki 20 ngut ki briew bad ki ïoh T.1 lak man la u snem haka Account jong ka kynhun bad T.1 lak haka account shimet, kumta ki ïoh T.2 lak man la u snem” ong u Conrad.
