1.73 lak mih ka pisa ba synñiang ki paidbah ha ka jingïalang VPP

0

Shillong, K’lyngkot 17: Namar ka jingkynnoh ïa ka VPP kum kata ka Very Poor Party ki paidbah kiba wan shim bynta sha ka jingïalang bah jong ka party kaba la pynlong ha ka sngi Nyngkong ha Madan Polo ki la pyni da ki nuksa ban noh synñiang sha ka party na bynta ka jinglut jingsep na bynta kane ka jingïalang bad kumjuh ruh na bynta ban pyntyllun ïa ki kam ka party.
Ka synñiang kaba ki paidbah ki la noh sha ka party hadien ba la wai ka jingïalang ka pisa kaba ki paidbah ki la synñiang ka kot kumba 1,73,223 tyngka ong ka khubor na ka VPP. Ha ka kyrwaoh sha ki lad pathai khubor u nongai ktien ka party u Dr Batskhem Myrboh u la ong ba kane ka jingsynñiang kaba ki paidbah ki noh sha ka party ka pyni ba ka bor u paidbah ym don ba lah ban khang haba u paidbah hi u la angnud ïa ka jingkylla.
“Da ka mynsiem jong ka jingkit khlieh ngin trei na bynta u paidbah ban shakri hok ïa kaei kaba u khmih lynti na ngi, bad ngi khot ruh ïa baroh ban snoh kti lang bad ngi ha kane ka jingïakhun ban pynïoh ïa ka synshar khadar kaba khuid bad kaba buh nyngkong ïa u paidbah ha khmat eh,” ong u Dr Batskhem.
Shuh shuh ka party ka pynpaw ïa ka jingsngewnguh halor ka jingmih ki paidbah ban shim bynta sha kane ka jingïalang wat la ki tip shai ba kum ka party kin ymlah ban ai bai kali, bai sngi bad wat ka bam ruh, “hynrei ka jingmih u paidbah ka pyni ba u paidbah u don ha ka liang kaba rai ban ïakhun pyrshah ïa ka bor ka pisa bad ki heh spah,” u la bynrap.

Leave A Reply

Your email address will not be published.