Da ka Rally ha Polo yn pynlong ka NPP ban pynbna ïa ki kyrtong MLA ha baroh kawei ka jylla
![](https://mawphor.com/wp-content/uploads/2022/07/mawphor-1.jpg)
Shillong, Kyllalyngkot 3 : Ka National People’s Party (NPP) kaba ïalam ïa ka sorkar MDA mynta la jan dap artad san snem kan sdang ïa ka jingïalap election jongka da kaba pynlong da ka rally ne jingïalang paidbah kaba heh ha madan Polo ha ka 12 tarik mynta u bnai bad ha kane ka jingïalang kan pynbna paidbah ruh ïa baroh ki kyrtong jongka ki ban ïakhun ha kane ka election MLA 2023 na kylleng ki Constituency jongka jylla.
Ka jingthmu jong ka NPP ban pynlong ïa kane ka long ban nang pynkhlaiñ shuh shuh ïa ka lyer jongka Party sha kylleng ki Constituency hapoh ka jylla. Hooid kum ka Party ka la nang ïai pynbna ïa ki kyrtong jongka haba don ki jingïalang ba heh ha ki constituency bapher bapher hynrei ban pyntip paidbah katno ngut ki kyrtong kan pynïeng kan sa pynbna ha katei ka jingïalang ha madan Polo.
Ki nongïalam jongka NPP haba ïakren bad ki nongthoh khubor na ka por sha ka por kata naduh u National President u Conrad K Sangma, National Vice President bah Prestone Tynsong, u President ka NPP ha ka jylla u Dr W.R Kharlukhi bad kiwei kiwei ki nongïalam ki la pynpaw ba ki kyrmen skhem ha kane ka kynti ka NPP kan jop palat ïa ka 30 ngut ki MLA bad kan ïoh ban bat hi ïa ka jinsynshar ha ka jylla. Ki la ong ïa kane namar ki la pynpaw ba ha kiba bun ki Constituency ka jingïakhun kan long beit ka NPP pyrshah ïa kiwei kiwei ki Party kata la ka long pyrshah ïa ka UDP, Congress, PDF, HSPSP, BJP, TMC, VPP bad kiwei kiwei ruh. Ki la ong ruh ba ka lyer jongka NPP ka beh bha ha kane ka kynti bad na kata ka daw ki kyrmen ba ka Party kan ïoh ka jingkyrshan ba pura na ki paidbah.
Lah ruh ban pynkynmaw ba ha kane ka kynti ki MLA kiba la dep pynïasoh sha ka NPP bad ki ban iakhun na kane ka party ki long I Dr Ampareen Lyngdoh, bah Mohendro Rapsang bad bah Kimfa Marbaniang. Ki ban sa pynïasoh ha kine ki khyndiat sngi ban wan ki long u bah Hamlet Dohling, bah Jason Sawkmie bad bah Samlin Malngiang. Kine kin sa hiar shuki noh kum ki MLA ha ka 4 tarik Kyllalyngkot bad kin sa pyniasoh sha ka NPP. U bah Jason un pynïasoh ha ka 6 tarik ha Umsning, bah Hamlet ha ka 7 tarik bad hadien kata sa u bah Samlin.