Pynliem ka Challenger FC ïa ka MLFC bad rah ïa ka song pisa ba 1.50 lak ha phutbol Lawsohtun
![](https://mawphor.com/wp-content/uploads/2022/04/Sports-750x430.jpg)
Shillong, K’Lyngkot 03 : Ka kynhun ïalehkai jong ka Challenger FC ka la ïoh ban rah ïa ka song pisa kaba 1.50 lak tyngka hadien ba ka la ïoh ban pynliem noh ïa ka MLFC ha ka lympung ïalehkai ba la pynlong da ka Lawsohtun Sports Club ha ka 31tarik mynta u bnai ha Lawsohtun.
Haba phai sha ka jingïakhun, dei ka Challengers FC kaba ïoh ban thep kol nyngkong hynrei dei tang hadien katto katne por ka MLFC ka la ïoh ban pynïakhaid noh.
Ka jingïalehkai hapdeng kitei ki kynhun ka long kaba itynnad bha wat hapdeng ka jingkhriat jong ka janmiet Tlang. Ka jingdon jong ki katto katne ki nongïalehkai ba kynsai ka jylla ban shim bynta lang ha katei ka lympung ka la khring bun bha ki nongpeitkai ha katei ka janmiet.
Kumta, hadien ba baroh arliang kim shym la ïoh shuh ban pynkhih jar na ka liang ki bor pyniaid ki la pynlong noh da ka tie-breaker ha kaba ka Challengers ka la pyntikna ia ka nam lahduh da 5-4 kol.
Na ka liang ka MLFC kaba mad ia ka nam rem ha katei ka sngi ka la ïoh ban khur ia ka song pisa kaba 70 hajar tyngka ryngkat ka khusnam. Na ka liang ki bor pyniaid ki la sam ruh ia ki khusnam bapher bapher sha ki nongïalehkai kiba kynsai kiba pyni ia ka jingtbit jong ki.
Ha katei ka lympung kaba heh bha ki la don haduh 66 tylli ki kynhun na kylleng ki bynta jong ka jylla kiba wan ban shim bynta.
Ia kane ka lympung ialehkai la pynhap pyrda da u Executive Member ka KHADC ba dei ruh u MDC ka thiañ, Bah Mitchel Wankhar kum u Kongsan. Ha ka jingkren u Bah Mitchel u la ai ka jingïaroh ïa ki bor pynïaid kiba la lah ban pynlong ïa katei ka lympung ïalehkai kaba heh bha bad ban pynhap pyrda ha ka sngi ba khatduh jong u snem.
U pynpaw ruh ka jingkmen ban ïohi ba ki samla Khasi kiba la kiew stet ha ki kam ïalehkai ym dei shuh tang ha ka jylla hynrei wat ha ki lympung ïakhun kiba heh ha ka Ri.