Khliehriat, Nohprah 21 : Ka Khasi Students Union East Jaiñtia Hills District kaba hapoh ka jinglam khmat u President, u bah Streamly Suchen, ka la noh syniang sha ka 7Thyndai Child Care Institute Cum Counselling Centre kaba don ha Tuberkmai Shnong da kaba pynshna ei ïa ka kynroh dewbilat sawdong kane ka Institute ba shong ki khynnah, ïa kane ka kynroh la dep ban shna bad u President rangbah ka seng u bah Lambokstarwell Marngar u la wan ban plie ïa u maw nongrim jongkane ka kynroh ha ka jingïa don ryngkat lang ki dkhot ha kaba ka la don ruh ka jingïalang ba lyngkot ha katei ka Centre.
Haba kren ha ka jingïalang, u bah Lambokstarwell Marngar, u la ai ka jingiaroh ïa ki longkmie kiba ai ka jingshakri jong ki sha ki khynnah ha katei ka 7Thyndai Child Care Institute kaba don ha shnong Tuberkmai Shnong kiba ïaid lyngba bun ki jingeh ha ka jingïaid lynti jong ki ban ai ka jingshakri ïa ki para doh para snam kiba la duh noh ïa ki kmie ki kpa bad ha kajuh ka por, u la ong ruh ba ka jinglong khun swet ka don ar bynta, kawei ka dei ka jingduh noh ïa ki kmie ki kpa bad kawei pat ka jait jinglong khunswet ka dei namar ka jinglong lyngkar ki kmie ki kpa bad u la bynrap ruh ba “Ka jingsynjor ka Jaitbynriew ka sdang na la ïing” ha kajuh ka por u la pynpaw ka jingsngew kmen ïa ka jing don ki longkmie jong ka Seiñ Raij Tuber ki ba kdup ban btin lynti ïa ki hep barit kiba shong ba sah ha katei ka Child Care Centre bad kiba pynshngaiñ ruh ïa ki bad weng noh ïa ka jingsngew tmang, ka jingsngew diaw mynsiem jong ki khynnah, kiba ïarap ban weng noh ruh ïa ka jingartatien na ki khynnah bad pyni ïa ki ïa ki lynti jong ka jingkyrmen ïa ka lawei jong ki.
Ka Secretary jong ka Seiñ Raij Tuber Women’s Wing, ka kong F.Ryngkhlem, ka la pynsngew ïa ka history jong ka 7Thyndai Child Care Institute Cum Counselling Centre kaba la seng naduh u snem 2017 ha kaba ha kane ka jaka la ri bad sumar ïa ki khynnah kiba la duh noh ïa ki kmie ki kpa, ka ïathuh ruh ba ki la ju pynlong da ki prokram bapher bapher ban pynmih pisa, ki ju pynlong da ka fete, ki Theatre, Miss Tuber bad ynda la mih ka pisa kin sa sdang ban seng ïa kane ka shlem ri khynnah ha shnong Tuberknai Shnong bad ha ka jingïaid lynti jong ki ruh la ong ba ki la ïakynduh shibun ki jingeh hynrei khlem kyrtiang dien ki la ïaid shaphrang haduh ban da lah ban saiñdur ïa kane ka shlem bad ka la long ka jingkyrkhu kaba khraw ïa ka imlang ka sahlang.
U President ka KSU East Jaintia Hills District, u bah Streamly N Suchen u la ong ba ka long kaba donkam ban ïarap ïa ki paradoh parasnam khamtam eh ïa ki khun kiba la shah ieh khunswet.
Kiba la ai jingkren ki kynthup ruh u President jong ka Seiñ Raij Tuber, u bah H. Phawa, uba la pynpaw ka jingsngew nguh bad ai khublei ïa ka KSU East Jaiñtia Hills District kaba la don lem ïa ka jingkitkhlieh ïa ka imlang ka sahlang bad kumjuh ruh kaba don ka jingkit khlieh ïa ka shongsuk shongsaiñ hapoh ka bri u Hynñiewtrep, u la ong ba lada ka KSU kam don ngim lah ban im namar ba ka dei ka seng kaba kloi ban mih sha khmat ban ïada ïa ki paidbah ka bri u Hynñiewtrep hynñiewskum.
