Jowai, Nohprah 21 : U Deputy Commissioner ka West Jaiñtia Hills District, Jowai mynta ka sngi ula pynmih ïa ka hukum ba baroh ki nongshong die rud surok kiba don ha ki bynta jong ka Iawmusiang bad kiwei de ki bynta jong ka nongbah Jowai ki dei ban kynriah noh na ki lynti ïaid kjat mar mar.
Ïa kane ka hukum la hap ban pynmih biang na ka ophis u Deputy Commissioner, namar ba katba nang mih ki sngi ki por ka jingshim jaka jong ki nongdie rud surok ïa ki lynti ïaid kjat kala nangjur nangjur bad kala wanrah jingeh haduh katta katta ïa ka ïaid ka ieng jong ki paidbah nongleit nongwan.
Kane ka jingshahknieh ki lynti ïaid kjat ha ki nongshong die madan kala pynlong ïa ki nongleit nongwan ban ïaid lynti lyngba ki surok bah bad kane bun sien ka wanrah ïa ka jingjia ba sngewsih ïa ki nongleit nongwan.
Kino kino kiba ïaleh pyrshah ïa kane ka hukum naduh bala pynmih ïa ka kin shah pynshitom katkum ki kyndon ka aiñ.
