Mawkyrwat, Ïaïong, 10: U bah Renikton Lyngdoh Tongkhar, Myntri ka tnad umbam umdih jong ka Jylla Meghalaya bad kum u MLA jong ka Mawkyrwat Constituency mynta ka sngi ka 9 tarik u Ïaïong, 2022 u la ïoh ban plie pyrda ïa ka jingrakhe jong ka jingdap 25 snem ne ka jubili rupa jong ka Seng Samla Shnong Mawten (SSSM) ïa kaba la pynlong ha Madan Mawpyllun, Mawten, South West Khasi Hills District.
U bah Renikton Lyngdoh Tongkhar haba kren kum u kongsan, u la ong ba ka jingdap 25 snem jong ka Seng Samla Shnong Mawten kam dei shuh kaba dang lyngkot ha ka jingïaid lynti hynrei ka dei kaba la jrong bha bad kaba la phuh samla bha. U la ong ruh ba kum ki samla ha kaba kum kane ka sngi ki don shisha ïa ka khmat ba phuh samrkhie namar ka dei ka sngi kaba kmen ba ki la pynpaw lyngba ki kam ba ki ki la trei da ka jinglamkhmat jong ki nongkitkam kiba rim.
“Ki sngi ki snem ki her stet haduh katta bad ym lap ba ïoh sngew ïa kata ka jingïaid stet jong ka por ha kaba kum ka Seng Samla Shnong mynta ka sngi ka la kynjoh ïa u mawmer ba 25”, ong u bah Renik bad ka jingdap pura ïa kane ka snem ka la long ruh lyngba kaba treishitom bad trei bor bah ha kiba bun ki kam ban wanrah ruh ïa ka jingbha ha ka imlang ka sahlang.
U la pynkynmaw ruh ba ka jingdap 25 snem, ka dei kawei na ki snem jong ka jingsdang jong kiei kiei ban nang pyntyllun khambha shuh shuh ïa ki kam kiba bun la ka long hapoh la ka jong ka shnong ka thaw, ka imlang ka sahlang ne wat ha ka ri bad ka jaidbynriew. Namarkata, kum ki samla haba ki sdang ban ïaid ïa ka lynti kaba jrong nangne shakhmat, u buh ha ki ïa ki kyntien jingkitbok kitrwiang ba kin nang lah ban leh ïa kiba bun kiei kiei ki kam kiba khraw.
“Ai ba ka jinglong ba bha ba kum ka Seng Samla Shnong ba ka la lah ban pyni mynta la 25 snem nangne shakhmat ruh kin ïaid da ka jingshlur lyngba ka jingbuh ruh de ïa ka nuksa ruh na ka bynta ki longdien mandien bad ba ki khun ki kti ruh kin ïohi ïa kata”, u la ong bad ha kajuh ka por lyngba kane ka sngi ba kyrpang jong ki samla ka lah ruh ban wahrah ïa ka jingpynïajan ïa ki khun samla, ka shnong ka thaw bad ha kiwei de ki bynta lyngba ka jingdon jong ka jingkitkhlieh jong iwei pa ïwei bad lyngba ka jingïatreilang ynsa lah ban wanrah ïa ki jingkylla ha kiba bun rukom.
U bah Renikton haba kren ha kaba ïa dei bad ka roi ka par, u la ïathuh ba ka Sorkar India lyngba ka Sorkar Jylla kan sa ïoh ban pyntreikam na ka bynta ka skhim umbam umdih ha kaba ka Shnong Mawten ka dei kawei na ki shnong kaba hap hapoh ka Mawkyrwat Greater Water Supply Scheme bad ïa kane ynsa lah ban trei noh khnang ba baroh kin ïoh ïa ka umbam umdih ha manla ki thliew ïing.
Ha kaba ïadei bad ka jingïoh kam ïoh jam, u la ong ba mynta ka long kaba donkam ban pynleit jingmut ha ka liang ka kam jngohkai pyrthei namar kane ka South West Khasi Hills District ka long kawei na ki distrik ba don shibun ki jaka ba itynnad bad ban pynwan dur ïa kita ka donkam ka jingïatreilang bad jingai ka kti kamon ka kti ka diang jong ki paidbah nongshong shnong.
U bah W.F. Lyngkhoi, President barim jong ka Seng Samla Shnong Mawten ha ka jingkren jong u u la pynkynmaw ba ïa ka Seng Samla Shnong Mawten la seng naduh u snem 1997 lyngba ka jingprad lynti bad ai jingmut da uwei na ki riew rangbah jong ka shnong uba dei ruh kum u Secretary Shnong ha kata ka por. U la ong ruh ba naduh ba sdang hi ki don shibun ki jingeh ha ka rukom pynïaid kam hynrei hapdeng kita kum ki nongïalam kim shym la kynran dien noh namar kumba ka ktien phira jong ka seng ka ong, “Tylli, Trei Hok bad Kiew Shaphrang”.
U la pynkynmaw ruh ba ha thmu ban leh ïa kano kano ka kam kaba bha, ki dieng pynkiang bad ki jingeh ruh ki don shakhmat bad ruh wat ka jingduh thiah duhdem ruh ki mat hynrei hapdeng kine kiei kiei baroh ki jop bad ki poi sha ka thong da ka jingïatreilang jong baroh. Ka jingkynjoh ïa ka karta jong ka jingdap 25 snem ka seng samla shnong ka long ka nuksa ba bha bad namarkata, u kyntu ba kum ki khun samla ki dei ban pyrkhat ïa ka hok, don ka jingïatreilang bad leh ïa kaba dei khnang ba kin jop hapdeng jong ka jingïaleh bad wat kynran dien.
Ka Iolinda Wanniang, Secretary jong ka Seng Kynthei Shnong Mawten ka la ai khublei jibili rupa na ka bynta ka Seng Samla Shnong bad ba kan nangkiew shaphrang ha ki sngi bad ki snem ki ban sa wan. Ka la ong ruh ba kane ka jingrakhe, ka long ruh kum shibynta ban kynmaw ïa ki nongkitkam ba rim kiba la long ki nongprad lynti bad da ka jingdon jong ka seng samla shnong ka la long ruh kawei na ka jingkyrkhu ïa ka Shnong lyngba ka jingtrei jong ki ban rad-dyngkhong ïa ki jingsniew kiba har rukom.
Ka la ong ruh ba watla ha ka jingïaid lynti jong ki samla, ki mat shibun ki jingeh hynrei to ïai long kiba ïa tylli ban trei, trei ha ka hok bad ka jingshisha bad ruh haba trei na ka bynta ka imlang ka sahlang ki don shibun ki jingeh bad ki jingshah kren beiñ hynrei long borabor kiba ïaid shakhmat. Ha kajuh ka por kum ki samla ki dei ruh ban khot ban wer lem ruh na ka bynta kiwei de ki para samla jong ka shnong khnang ba kin long kiba ïatreilang ha ki bynta bapher bapher ban wanrah ïa ka bha ka miat ha ka shnong ka thaw baroh kawei.
Haba pynkut ka la buh ruh ka jingkyrpad na ka bynta ki kmie ki kpa ba kin ai mynsiem lem na ka bynta ki khun ki kti jong ki ba kin long kiba ïa shimbynta lem bad kiwei de ki para samla namar da ka jingdon jong ka Seng Samla Shnong ka ïarap ruh ban peit ïa ka synshar khaddar hapoh jong ka Shnong ka thaw.
U Myntri jong ka Shnong Mawten, u bah L. Lyngkhoi u la pynpaw ka jingaikhublei na ka bynta ki nongïalam kiba rim kiba la pynwan dur ïa ka Seng Samla Shnong kat haduh kane ka sngi ba mynta. Namarkata, ka long kaba donkam ba ki nongïalam kiba mynta ruh kin ïai long ki samla kiba trei hok, trei shitom na ka bynta ban rad-dyngkhong ïa ki jingsniew kiba la jyllei ha kine ki sngi khamtam eh kum u ‘drok’.
