Nongpoh, Nohprah 18: Uwei u rangbah u la duh noh ïa ka la jingim ha kawei na ka jingjia ba sngewsih, kaba dei na ka jingpluh jong kawei ka ïingtrep kaba u sah ha khlaw ban peit ïa ki kam rep ki kam riang.
Kane ka jingjia la suba ba ka la jia dang step phyrngap hapoh katei ka khlaw ba don ha ka Shnong Sohlaitthymmai ha Ri Bhoi, ha kaba la ba ym lah ban tip ïa ka daw kumno katei ka ïingtrep ka la pluhding bad utei u rangbah u la ingkhong lang ha katei ka jingpluh ka ïingtrep.
Une u rangbah ba la shah bamduh ha ka ding ha katei ka ïing trep la tip kyrteng kum u Braveman Tangsang bad uba la don 30 snem ka rta bad uba wan rep wan riang sha Ri Bhoi ha ka khlaw kaba don ha ka Shnong Sohlaitthymmai ha Ri Bhoi.
Kumba la ïathuh da u kpa jongu, u Bah Ale Khongjoh, la ong ba une u rangbah u dei na ka thaiñ Ri War bad u shu wan rep wan riang sha Ri Bhoi da kaba sahwai ha ka shnong Mawpdang Saiden ban rep ban riang ha katei ka khlaw bad la ïathuh ruh ba hynnin ka sngi u la leit sha ka jaka rep ba don katei ka ïingtrep ba ju pyndonkam ban ap ïa ki kam rep ka kam riang bad namar ba um wan phai ïing kumba u la kren ban wan phai biang sha la ïing hadien ba u la leit trei hynninn ka sngi sha katei jaka, kiba haïing hadien ba kim ioh ban phone bad bay m wan phai ïing ki la leit wad ïa u bad la lap pynban da ka jingjia ba sgnewsih ba une u rangbah u la ingkhong lang hapoh katei ka ïingtrep, ong u kpa jongu, u Bah Ale Khongjoh.
U Bah Khongjoh u la ïathuh ruh ïa ka daw tynrai jong kane ka jingjia ym lah ban tip ha kano ka rukom katei ka ïingtrep ka la pluh bad ma u ruh u la ingkhong lang bad ha ka jingshisha u dei u samla ba ym ju don kano kano ka dak sniew ha ka jingim jong u bad u dei ruh u briew u bym ju dih ju bam.
Shuh shuh, haba leit wad ïa utei u rangbah sha katei ka jaka rep ba don ka ïing trep la don lang ruh naduh ki nongïalam shnong ka shnong Mawtnum bad ryngkat ki bahaïing jong u bad kaba sngewsih ka long ba hadien ba la poi ha katei ka ïing trep la lap pynban ba u la ingkhonglang na ka jingpluh katei ka ïing trep kaba ym lah ban tip ïa ka daw tynrai, u la bynrap.
Kumba long haduh ba la thoh ïa kane ka khubor, ki bor pulit kim pat ioh jingtip halor kane ka jingjia bad ba kiba haïing kim pat ioh lad ruh ban pyntip sha ki bor pulit halor kane ka jingjia.
