Na Constituency u DyCM bad Speaker, sdang ka VPP ban pynbna kyrtong MLA 2023

Shillong, Nohprah 12 : Ka Voice of the People Party (VPP) ha ka sngi Nyngkong ka la pynbna ïa ka kyrteng jong ki 14 ngut ki kyrtong kiban aireng ha kane ka elekshon MLA ha u 2023, kynthup na constituency jong u Symbud Myntri Rangbah ka jylla, Bah Prestone Tynsong bad ruh na constituency u Lamphang ka Ïing Dorbar Thawaiñ ka jylla, Bah Metbah Lyngdoh.
Ka party ka la sei da u Bah Manbhalang Thabah ban aireng pyrshah ïa u Bah Prestone na Pynursla bad ruh da u Pastor Shanlang Warjri ban ïakhun pyrshah ïa u Bah Metbah na Mairang constituency.
U Chairman ka State Election Committee, Dr. Kara Chen haba pynbna ïa ki kyrtong ban aireng ha kane ka elekshon u la pyntip ba na Khliehriat ki la jied da u Bah Damewanhi Rymbai, Dr. Ricky AJ Syngkon na Umsning, Bah Heavingstone Kharpran na Mawryngkneng, Bah Brightstarwell Marbaniang na Mawlai, Bah Avner Pariat na East Shillong, Bah Raja Jyrwa na West Shillong, Bah Danny Langstieh na Shillong South, Kong Aibandaplin F Lyngdoh na Mylliem, Bah Winston Tony Lyngdoh na Nongthymmai, Bah Ardent M Basaïawmoit na Nongkrem, Bah Doristar Marbaniang na Mawphlang, bad Bah Overlin Imiong na Ranikor.
Haba kren bad ki lad pathai khubor, u Dr. Kara ba dei ruh u Vice President ka Party u la ïathuh ba katei ka thup ba ki pyllait ha katei ka sngi kadei ka bynta kaba nyngkong bad ïa ka bynta kaba bud pat kin sa pynbna ha ki khyndiat por ban wan.
Shuh shuh haba jubab ïa ka jingkylli, u la, “Haduh mynta don tang uwei u MLA u ba pynpaw ba u kwah ban ïakhun na ka VPP bad mynta sa tang katto katne por un sa pynïasoh noh sha ka party.” Watla u khlem pynpaw ïa ka kyrteng jong utei u MLA hynrei u la shu ong ba u dei u MLA jong ka Shillong North.
Na ka liang u Nongai ktien ka Party, Bah Batskhem Myrboh u la ong ba kum ka party kim ju leit satia ban khroh ïa ki kyrtong kumba leh kiwei ki party. “Dei ma ki, kiba wan hi ban tyrwa bad ha shwa ba ngin pdiang ruh ngi da bishar bniah bin pa bin. Ngi peit ruh ym dei tang ba ki don jingkyrmen ban jop hynrei ruh ïa ka jingskhem ka nongrim ba ki don.”
Halor ka jingkylli, la ka party ka don jingthmu neem ban ïatrei lang bad kiwei pat ki party hadien ka elekshon, utei u rangbah u la ongba lada ïoh thaw sorkar kano kano ka party ruh hynrei ka VPP kan buh shwa ïa ka nongrim bad ki mat treikam hakhmat duh bad lada ka rai ban treilang badno badno ruh kan long beit halor ki nongrim ym na bynta ka shuki Myntri.
Kawei pat ka mat kaba ki nongialam ka VPP ki pynpaw ka long ba ka mat iakhun elekshon jong ki kadei beit ymda ka bor ka pisa hynrei ban pynsngewthuh ia ki paidbah ba kin jied ia ki nongmihkhmat da ka lynti kaba khuid bad da kaba bishar bniah ia ka jinglong ki kyrtong ym ban shah pynbiej ha ka bor jong ka pisa.