Khatduh, ai ksai u Bah Samlin ban mih noh na ka HSPDP bad ïakhun na NPP

Shillong, Nohprah 13 : U MLA ka HSPDP na Sohiong Constituency ha kaba khatduh u la ai ksai ba un mih noh na ka HSPDP, ka party kaba u la jop kum u MDC bad ruh kum u MLA ha u snem 2018 bad mynta u pynkhreh ban aireng noh na ka party kaba thymmai ha u 2023.
Watla um pat treh ban pynpaw na kano ka party un mih ban ïakhun ha ka elekshon ban wan, utei u MLA haba kren bad ki lad pathai khubor u la ong, “Kaei kaba phi ïohsngew shane shatai ka lah ban dei bad mynta ngi ap sa tang ïa ka Executive Committee ban shim ïa ka rai kaba khatduh halor kane shuwa ban jam shakhmat.”
Katkum ka jingong jong u, katei ka sienjam ba u shim kadei hadien ba u la bishar bniah ïa ka jinglong jingman ka synshar khadar ha ka jylla ha kine ki snem ba u long kum u nongmih khmat bad kum u Myntri ka sorkar jylla.
“Ha ka synshar khadar hi ngi donkam ïa ka party kaba heh khnang ban ïoh ïa ka sorkar kaba skhem tang da kawei ka party ban synshar khnang ba ngin lah ban ïa ka jingshakri kaba kham bha shuh shuh,” u la ong.
Shuh shuh u ong ruh ba ha ka sorkar kaba khleh khawlang bad bun ki party bun ki kam ne ki rai ba ki shim kim long satia kiba ïaid beit. “Teng teng na kawei ka party ki ong ba kane ka biang bad don kiwei pat ki party kiba ong ba kane kam biang bad kane ka pynlong pynban ban mih ka jingsynjor ha ka sorkar.”
Haba kren pat halor ka jingleit pynïasoh noh u Bah HDR Lyngdoh sha ka UDP, na ka liang u Bah Samlin u la ong ba ha ka elekshon ha Sohiong hi lada ïakhun na kano kano ka party ka long hi kumjuh. “Lada u Bah HDR u leit ban ïakhun na ka Congress ne na ka UDP ruh ka long hi kumjuh. Wat ïanga ruh kan long kumjuh hi lada nga shim ïa ka rai ban mih bad ki paidbah ban leit ïakhun noh na kawei ka seng.”
Lah ban kdew hangne ba ha u 2018 u Bah Samlin u la ïakhun na ka tiket HSPDP bad pynliem ïa u kyrtong ka Congress Bah HDR Lyngdoh hynrei mynta ka elekshon pat kitei baroh arngut kin ïakhun noh na ki party thymmai.