Kyntu u Myntri ban pynshai paidbah ïa ki skim bapher bapher ban wanrah jingmyntoi ïa ki paidbah

Khliehriat, Nohprah 09: U myntri ka sorkar jylla, u bah Kyrmen Shylla ha ka jingdon ryngkat lang u Secretary jong ka Social Welfare jong ka jylla Meghalaya, u bah I.W.Ingty, IAS, mynta ka sngi u la pylllait paidbah ïa ka CM Cares bad ha kajuh ka por la rakhe ïa ka District Convention of Front Liners ha East Jaiñtia Hills District kiba dei ki nongtrei kiba hakhmat eh ha kaba ai ïa ka bam kaba biang ïa ki khynthei bad ïa ki khynnah kiba na ka tnat Social Welfare, ïa kane ka prokram la khot pynlong da ka tnat Social Welfare ha ryngkat ka jingïatreilang bad ki bor district jong ka East Jaiñtia Hills District.
Haba kren kum u kongsan, u bah Kyrmen Shylla, uba dei ruh u myntri uba dei peit ïa ka tnat Social Welfare hapoh ka jylla, u la ong ba u myntri rangbah ka jylla, u Conrad Sangma u la pynbna paidbah ïa kane ka CM-CAREs skim (Kaba pynsuk, kaba ïarap, kaba burom bad pynkup bor ), kaba ai jingkyrshan da ka pisa ïa kito ki nongshongshnong kiba la tymmen, ki longkmie ki bym don kpa shuh bad ïa kito kiba don jingduna ha ki dkhot met, u la ong ruh ba ka sorkar Meghalaya ka la shim ïa ka synjam ban pynduna ïa ka SAM bad MAM ha ki khynnah, la ong ruh ba da ka jingtrei shitom bad trei bor bah ka tnat ka koit ka khiah, ka tnat Social Welfare, ka tnat ka pule puthi bad kiwei kiwei ki tnat kiba don bynta lang (Line Departments) ka jylla Meghalaya ka la kynjoh haduh 90 percent ïa ka SAM bad MAM ha ki khynnah.
La ong ruh ba ka tnat Social Welfare ka la pynbit pynbiang ïa u khaw uba na ka tnat Food Coorporation of India (FCI) ha kaba la phah sha Delhi bad pynbit pynbiang ruh ïa ki jait vitamin bad mineral ban kyntiew ïa ka koit ka khiah ha kaba ynda la dep ban test la wanrah biang shapoh ka jylla bad sam lyngba ki ICDS Centre.
U bah Kyrmen u ban jur ruh halor ka jingdonkam ban ai ki jingpynshai paidbah halor ki skim bapher bapher kiba wan na ka tnat Social Welfare bad kyntu ïa ki heh sorkar, ki ASHA, ki Aganwadi bad ki bor shnong ba kin shim khia halor kane, u kyntu ruh ïa ki paidbah ba kin leit mih sha ki tnat sorkar kiba don hapoh ka district ban wad jingtip halor ki jait skim kiba wan na ka sorkar.
U Consultant, Poshan Abhiyan, u bah G. Nengnong, ha ka jingkren lamphrang, u la ïathuh ba ha u bnai nailur jong u snem 2020 ka jylla ha ryngkat bad ka ri hi baroh kawei ka la shim ïa ka synjam ha kaba la pynlong da ka drive ban wad jingtip ïa ki khynnah kiba don ha ka SAM & MAM bad lyngba kane ka Drive la lap ba ki don haduh 16,327 ki khynnah kiba dei ki MAM bad 1,788 ngut ki khynnah kiba dei ki SAM bad kat haduh u bnai rymphang jong u snem 2021 ka jylla ka la kynjoh haduh 95 percent shaneng, katba ka jingjurip jong ka National Family Health Survey 6 (NHFS) kan sdang ha u bnai lber jong u snam 2023 bad khmihlynti ba ka East Jaiñtia Hills District kan shim ïa ka synjam kaba radbah ban don ki khynnah kin poi 80 haduh 90 percent ha ki Aganwadi Centre bad yn lah ruh ban peitbniah ïa ka koit ka khiah jong ki.
Ka DPO, jong ka tnat ICDS, ka kong Y.Najiar, ka la kren halor ki kam bad ki jingkitkhlieh ba ki nongtrei Aganwadi , ki ASHA bad ki dkhot SHGs ki dei badn leh ïa ki kam kumba la bthah da ka MSRLS ban pynduna ïa ka MAM bad SAM ha ki khynnah.
Kiwei pat kiba la ai jingkren ki kynthup u Deputy Commissioner, u Abhilash Banarwal,IAS, ka District Social Welfare Officer, East Jaiñtia Hills District, ka kong R. Passah.
Kum ka dak ka jingiaroh ïa ka jingtrei shitom jong ki AWW bad kiba ïarap ïa ki AWW, u bah Kyrmen Shylla u la pynbna ïa ïa ki incentive kaba T1500 tyngka ïa ki AWW, T 750 tyngka ïa ki Mini AWW bad T 500 tyngka ïa ki jingïarap ïa ki AWW.
La sam ruh ïa ki ID Cards sha ki nong ioh jingmyntoi na kane ka CM-CAREs bad la ai ruh ia ka khusnam sha ka Rymbai Pompyrthad Anganwadi Centre bad ki nongtrei Aganwadi bad ki nongiarap bad kumjuh ruh sha ki Village Organisation kiba don hapoh ka district kiba la ai ka jingiatreilang ha kaba pynduna ïa ka SAM bad MAN hapoh ka district.