Hynñiew tylli ki kam pynroi wan plie mawnongrim u Symbud Myntri Rangbah ha Jowai

Jowai, Nohprah 08: U Deputy Chief Minister ka sorkar jylla uba dei peit ïa ka tnad PWD (Roads) u bah Prestone Tynsong mynta ka sngi ula wan ban plie ïa ki hynniew (tylli ki mawnongrim jong ki kam pynroi bapher paber hapoh ka 2-Jowai Constituency haka jingïalang ba la pynlong ha madan Mihmyntdu West Jaiñtia Hills District.
Ha kane kane ka sngi la wan ban ïadonlang naduh u myntri jong ka tnad kam pynroi sor u ma Sniawbhalang Dhar, u MLA ka thaiñ u ma Wailadmiki Shylla, u CEM ka JHADC ma Thombor Shiwat, u Waheh Shnong ka Mihmyntdu u ma Abul Phawa nalor kiwei de kiba la shah khot sngewbha ha ryngkat ki paidbah nongshong shnong.
Ha kane ka sngi na ka liang u bah B.W Phira Superintending Engineer PWD (R) Jowai Circle Jowai ula pynsngew ïa ka jingmang pisa na ka bynta kine ki kam pynroi kiba kynthup ïa ka jingshna pynbha ïa ka surok hapoh ka sor Jowai lyngba ka jingiarap ka World Bank MITP haka jingjrong kaba 33.00 km kaba 28 klur, ka Internal Roads ha Mihmyntdu ha ka jingjrong kaba 6.677 km hapoh ka RIDF-XXVII kaba kot 5 klur, ka jingshna ïa ka jingkieng ba pynïasoh na KNB sha Thomas Jones College kaba 80 lak, ka jingshna ïa u surok PWD ha Sabah Muswang ha ka jingjrong kaba 2.779 km kaba 2 klur , ka jingshnapynheh ïa u suroh Demthring-Sohmynting-Moodymmai Road ha ka jingjrong kaba 22.30 km kaba kot 45 klur, ka jingshna pynbha ïa u surok shnong (Internal Village Road) ha Niriang ha ka jingjrong kaba 2.08 km kaba 1 klur tam, ka jingshan ïa u surok PWD na Madan Thadlaskeiñ sha Mission Aitnar haduh Mutong kynthuh ïa ki kynroh ki nala um kaba kot 2 klur tam baroh kine ki kam pynroi kila poi sha ka Rs. 84, 14,37,000/- tyngka.
Na ka liang u kongsan bah Prestone Tynsong ula ai ka jingïaroh ïa u MLA ka thaiñ da kaba ong ïa ki kyntien ngi ki briew “ngi peit tang nabar, hynrei kaba napoh dei ka jingïalam jong u Blei” kumta ka donkam ïaki khun samla ban ïohi ïa ka jingkylla dur jong ka Constituency hapoh ka jylla.
U buh ka jingkyntu ïa ki paidbah nongthep vote jong ka jylla ba ki dei ban pynshong nongrim bha ïa uno uno u briew uba lah ban ai ka jingshakri kaba bha tam ïa ka Constituency, namar kumba long mynta tang kine ki kam pynroi ba wanroh u MLA kiba poi sha ka 260 klur eiei bad ki dei ruh ban pyndep ïa ki ha ka snem 2024.
Hapoh ka jingïalam ula ong u Conrad K Sangma kila pyrshang ban wanrah ïa ki kam pynroi bapher bapaher hapoh ka jylla, khamtam ïa ka sor Jowai bad u kyrmen ba jingitynnad jong ka sor Jowai ka urlong tang ha kine ki kyndien snem.
Ula kynthoh ïa u nongialam ka liang pyrshah u Mukul Sangma da kaba ong kat ki kam ba bha kiba kane ka sorkar ka leh hynrei ula pynpaw beit ïa ka jingpyrshah bad kaba lait, kumta u kyntu ïa ki paidbah ba ki dei ban bishar iï ka kam ym ïa ki social Media namar ha ka social media kiba bun hi kaba lait ban ïa kaba dei.
Ula ïathuh ha ka jingïaid lynti ki don shibun ki jingeh ba kane ka sorkar ka ïakynduh kiba kynthuh naduh ka jingjia Ichamti, ka CAB, ka Them motor, ka thma Covid-19 bad kane ka sorkar kala ïakhun tyngeh ban pynbeit ïa kine kiba long ki jingkyrkhu ïa ki paidbah ka jylla hi baroh kawei.
U bah Prestone ula pyntip ha kaba ïadei bad ka Phase-1 jong ka jingpynbeit pud kila don shibun ki jingeh bad ki jingshah kynnoh ïa ki nongïalam naduh u Conrad Sangma bad ma u ruh kymjuh, hynrei u na ka liang jong u ula pynsngew “ba um tieng wat lada um don shñiuh hynrei u shñiuh jong u un ïeng, kine baroh dei tang ban leh ïa kaba dei ong u bah Prestone.
U kyrmen ba ïa kane ka Phase II jong ka jingpynbeit pud ka sorkar yn leh da ka jingïasngewthuh jingmut lang hapdeng ki ar jylla ha kaba yn don kyndiat khynsoit ka Plus bad ka Minus da ka jingïahun lang na baroh arliang.
Shuh shuh ula pynsngew hadien jong ka sorkar bala dep ki don beit kita ki kyntien kiba ong Status Quo bad ynda ula pynkylla Khasi ka long “habneng ruh em ha khyndew ruh em”, bad kine kiba sah ha Border ki shem jingeh hynrei mynta kane ka sorkar kam kren shuh ïa kane ka Status Quo hynrei ka ïaid shakhmat ban pynbeit ïa u pud u sam.
U ma Wailad ha ka jingkren ula ong u surok u long u budlum jong ka roi ka par bad kaba sngewkmen kum u nongmihkhmat ula lah ban pynthymmai lut ïa baroh ki surok hapoh ka Constituency bad kane ka long ka jingmyntoi kaba khraw eh.
Ula pynbna ïa kiwei de ki project ha kaba ïadei bad u surok By pass na Khliehtyrshi haduh Treïongriang kaba la kot sha ka 93 klur tyngka bad ïa u surok na Treïongriang haduh Pynthor ïa uba la dep ban pyntrei, kumjuh ïa u surok By-Pass na Thadlaskeiñ haduh soomer uba la sniew shaba palat hynrei ka sorkar kala dep mang pisa haduh 14 klur ban pynbha pynmiat bad ka kam kan sdang noh nalor kiwei de ki kam pynroi ban shan surok.
“Kine baroh dei lyngba ka jingïarap jong u myntri ba dei khmih ïa kane ka tnad u bah Prestone Tynsong bad kumjuh ïa kane jingïalam ba stad jong ka sorkar MDA la pynsngew u ma Wailad.
U ma Sniawbha ula ong ba kine ki maw ba la pynïeng ha kane ka sngi kim long tang kumne hynrei ki don napdeng kine ki project kiba la dep, ki don ruh kiba dang treikam mynta. Halor kane ula ai jingïaroh ïa u MLA ma Wailadmiki Shylla ula la trei shitom ban wanroh ïa ki kam pynroi bapher bapher.
Ula ai jingïaroh ruh halor ka jingshemphang jong u MLA uba la don jingmut ban wanrah pynban da ka Mini Secretariat ha nongbha Jowai bad ka jingpynbna Smart Town ïa ka Jowai, ula pynsngew ruh ïa ki kam sahteng kiba la dep ban pynurlong hapoh ka Jowai.
Shuh shuh ula pynsngew ba dei tang kane ka sorkar kaba lah ban wanrah ïa ki kam pynroi ha baroh ki liang kaba ym duna da ki spah klur tam tyngka ha manla ki Constituency hapoh ka jylla. Ha ka juh ka por u pan ka jingkyrshan na ki paidbah ba kin ai jingkyrshan biang sa shisien ïa ka sorkar MDA ha kane ka Election ban wan jong ka snem 2023.