Khot bad ïawer paidbah ka ECC ban ïa snohktilang ha ka jingïaid paidbah ban pyrshah ïa ki karkhana coke

Khliehriat nohprah 6: Ka Environment Coordination Committee Elaka Sutnga ka khot bad ïawer ïa ki paidbah ba kiba don ka jingsngewkhia ba kin wan ban ïa snoh kti lang ha ka jingïa ïaid paidbah kaba kin pynlong ha ka 15 tarik mynta u bnai ha East Jaiñtia Hills District, ka jingiaid paidbah kan sdang naduh 1Kilo shaduh ophis u Deputy Commissioner ha Khliehriat.
Na ka liang ka ECC ka pynshai ba katkum ka hukum ba la pyllait da ka National Green Tribunal myn ha ka 8 tarik u naitung 2022 ka la bthah ïa ka sorkar jylla lyngba ka tnat Meghalaya State Pollution Control Board ban lum ïa ka pisa ba la daiñ kuna na ki laiphew wei tylli ki Unit kiba dei ki karkhana kiba la pyntrei beaiñ khlem pat ïoh ïa ka Consent To Established kaba long haduh T5.5 klur tyngka, na ka liang ka NGT ka la dep ai por saw bnai ban leh ïa kane, hynrei wat hadien ba la kut ka por ba la buh ruh kaba kut myn ha ka 8 tarik u naiwieng 2022 ka sorkar kam pat shym la lah ban leh ïa kane.
La ong ruh ba ki nongïalam jong ka ECC ki la dep ban ïa kynduh ïa ki heh sorkar jong ki tnat bapher bapher, kumjuh ruh ïa u myntri rangbah ka jylla bad ïa u Deputy Commissioner ban ïakren halor ki kam ki jam hynrei la ong ba kam don satia kano kano ka jingsei soh.
“Ka sorkar ka la kyntiat beiñ shisha ïa ki paidbah jong ka elaka bad ki paidbah jong ka district bad kumjuh ruh u myntri ba dei peit u khlem burom shuh ïa ka sur jong ki paidbah ka elaka bad khlem burom shuh ïa ka jingim ki nongshong shnong, ha kaba wat ka NGT ruh ka la shim ba ka sorkar kam shym la shim khia ban ïada ïa ka jingim jong ki nongshongshnong, watla ngi la don bun ki jingiakynduh lang bunsien, hynrei ngi iohi ruh ba ka sorkar ka leh mynthi bad leh kyllut bad kam shym la leh ruh kumba la dep bthah da ka NGT” ong u kyrwoh.
“Na ka daw ka jingleh mynthi bad leh kyllut ka sorkar ngi ki paidbah jong ka elaka Sutnga ngi la rai ba ngin ïa mih paidbah biang sa shisien ha ka 15 tarik mynta u bnai ban pynpaw ïa ka jingpyrshah ïa kane ka jingleh kuman ka sorkar, ha ka jingshisha ïa kane ka jingïaid paidbah ngi la thmu ban pynlong myn ha ka 25 tarik u naiwieng hynrei na ka daw ba don ka jingjia ba sngewsih kaba la jia ha shnong Mukroh kumta kum ka dak ka jingsngewlem ïa ki mynsiem kiba la khlad ngi la pynkynriah noh ïa kane ka rally sha ka 15 tatik u nohprah” Pynkut u kyrwoh.