Tyrna, Nohprah 05: Ka Ealaka Tyrna, lyngba ka Tourism Management Committee ka la pynkhreh shaid shaid na ka bynta ban pynlong ïa ka Living Roots Festival kaba ar, ka ban long ha ka 7 bad 8 tarik mynta u bnai.
Ïa kane ka Fetival yn plie da u Shongknor ka Ïingdorbar Thawaiñ ka jylla, u Bah Metbah Lyngdoh, ha kaba yn ïadolang u MLA ka Shella, u Bah Balajied Kupar Synrem, u MDC ka Shella, Bah T. Dkhar bad ki ophisar na ka Sohra Civil Sub Division.
Ryngkat bad kane ka Festival yn pynlong ruh ïa ka jingrakhe dap 125 snem ka Shnong Tyrna, naduh ba la kynriah noh ïa kane ka Shnong na ka shnong kaba rim hadien jong u jumai bah ha Ri Khasi ha u snem 1897.
Ha kane ka Festival kin don shibun ki Prokram kiban pyni ïa ka rukom tynrai jong ka thaiñ Riwar naduh ka riam ka beit, ka kup ka sem ka bam ka dih bad khamtam eh ïa ka jingriewspah kane ka thaiñ ha ka liang ka jingdon ki jingkieng jyrmie ne ki jingkieng thied.
Lah ban kdew hangne ba ka Tyrna kaba mynshuwa kadei ka shnong jong u soh u pai, khamtam u sohñiamtra bad u kwai u tympew. Hynrei hadien kane ka kam rep soh bad kwai tympew ka la hiar noh bad ki briew ki la sdang ban mad jingeh. Hynrei ka jingkiew ka kam shang pyrthei naduh ba la mih ka jingkieng thied ba armala na Nongriat, kaba dei ban ïaid lynti na Tyrna ka la kiew kynsan ka ïojh ka kot bad kamai kajih ki briew. Dei lyngab ka jingpaw ka jingkieng thied ba kane ka thaiñ ka la trei shitom ban sumar bad tyngkai ïa ki jingkieng thied dieng.
