Shillong, Naiwieng 24: Khyndiat por hadien ba ka la don ka jingpyrshang ban wiang ding ïa ka Kali ba kit ïa ki Pulit bad kumjuh ruh ka jingsiat tear Gas ïa ki dkhot Sengbhalang ba pynlong jingïakhih namar ka jingjia ha Mukroh, la ïohi ba ka sorkar ka la sei madan da ki spah ngut ki Pulit SOT kiba la kieng atiar bad pynbiang bha ki tiar ïaleh bad ki tiar jingïada.
La ïohi ba kine ki Pulit riam ïong bad riam thoh rew, ki la leit da ki Bos kylleng kylleng ki jaka jong ka nongbah Shillong ban pahara ha kiba bun ki jaka, khamtam ki jaka ba long ki ïew ki hat, ki ophis sorkar bad ki jaka ba ïashong khleh jaidbynriew.
Nalor ki SOT la ïohi ruh ïa ki Pulit CRPF kiba la ap pahara ha ki kyntoit kyntoit ki la ap ha ki bynta jong ka surok National Highway. Nangta wat sha kiwei de ki District ruh la bthah ïa ki Pulit ban pahar bad peitngor bha ïoh don ki kali kiba wan na Assam, khnang ban lait kano kano ka jingjia ba sngewsih.
