Dei ban trei shitom, minot bad ym dei ban pynlehnoh ei ïa ka sap ka phong : Kenes L. Nonglait

Mawkyrwat, ‘Naiwieng, 24: U President ka FKJGP, South West Khasi Hills District, bah Kanesjune Lyngdoh Nonglait u kum u kongsan ha ka jingkren jong u ha ka jingïalang ban plie pyrda ïa ka lympung ïalehkai kynjatbol ba la pynïaid da ka FKJGP Mawpud Area Unit, u la pynkynmaw ïa ki ‘rangïalehkai da kaba ong, “Ki dei ban trei shitom bad ban minot bad kim dei ban pynleh noh ei ïa ka sap ka phong ba phi don”.
Ki kynhun kiba la mih madan ban ïakhun ha madan ki long hapdeng ka Mawmotmyndaw Football Club pyrshah ïa ka JCB Football Club ha kaba ha kane ka jingïalehkai kaba dei ha ka kyllastep bad ka kyllamiet ki la ïa thep mar 2 kol. Kumta ha kaba kut hi ki nongpynïaid ki la hap ban pynïalehnoh da ka Tie Breaker ha kaba ka Mawmotmyndaw FC ka la ïoh ban pynliem ïa ka JCB FC da 3 – 2 kol.
U bah Kenesjune L. Nonglait kum u kongsan haba bynrap ïa ka jingkren ha ka jingïalang, u la ong ba kum u nongïalam u sngewkmen ban ïohi ba ki samla ki mih shakhmat ban ïa shimbynta ha kum kine ki jait jingïalehkai, namar lyngba kine ki lympung hapoh ki shnong thaw kan long ka lynti ban poi ban ïashimbynta ha kiwei de ki jaka jong ka distrik ne wat ban ïoh ruh ïashimbynta ha ki state level bad hapoh ka Ri. Namarkata, u ïohi ba kiba bun ki nongïashimbynta ïa ka ka jingplie pyrda ïa kane ka jingïalehkai ki dei kiba dang bun ba kin hap ban dang ïaid shakhmat namar ki dei kiba dang lung ka kyrta. Kumta, u la ai mynsiem ba ka donkam ïa ki ba kin nangtrei shitom ban shuh bad kin dang lah shuh shuh ban ïashimbynta na ka por sha ka por bad kumba long mynta ba bun kine kiba shimbynta ha kane ka sngi ki dang dei ki khynnah ba dang pule.
Namarkata, u bah Kenes u la pynkynmaw ba jingpule ka long kaba donkam namar lada ki leit ban ïashinbynta ha ka State Level lane ha kiwei ki jylla kan shem jingeh ïa ki ha ka ktien ka thylliej. “Phi dei ban trei shitom bad ban minot bad phim dei ban pynleh noh ei ïa ka sap ka phong ba phi don”, ong u bah Kenes. Shuh u la kyntu ruh ïa ka unit ba haba ka don ka jingsdang kan don ruh ka jingpynkut da kaba kin pynlong shuh ïa kiwei kiwei ki jingïalehkai bad ym kan kut tang kane ka jingïalehkai kynjatbol kaba mynta.
U la ong shuh ba kum ki ‘rangïalehkai lane ki kynhun ki ban long kiba la pynkhreh bha, shwa kano kano ka jingïalehkai bad ha kajuh ka por u kibok ïa baroh ar tylli ki kynhun ba kin ïalehkai bha. “Ha ka jingïaleh hi kan don beit kawei kaba jop bad kaba rem, bad kiba shah rem ki dei ban shim ba ka dei ka jingïaid lynti kum ki ‘rangïalehkai ba kin hap ban mad hynrei phi dei ban kut jingmut ba phin da ïa minot pat ha kawei ka sngi”, u la ong.
U bah Balse Kharbani, General Secretary ka FKJGP, South West Khasi Hills District kum u symbud kongsan ha ka jingkren jong u, u la pynpaw ba kum u nongïalam u dap da ka jingsngewkmen ïa kaba u la ïoh jingtip ba ki nongïalam jong ka FKJGP Mawpud Area Unit kan pynlong ïa kane ka ka jingïalehkai kynkjatbol, namar ba kum ka seng ka don ka mynsiem ban kyntiew ïa ki samla jong ka jaidbriew kiba don ka sap ka phong ban mih shakhmat ban shimbynta ïa ki jingïaleh khamtam ha kane ka juk ka ba mynta ka jingïalehkai kynkjatbol kam dei shuh tang ka jingïalehkai ban pynbyrngia hapoh ki shnong ki thaw hynrei ka la dei kawei ka lad kamai pisa.
Namarkata, u kyntu jur ïa kine ki samla ba ki nangtrei shitom ban kilanmet ba kin sa shim bynta ruh ha ki district level, ha ki state bad kumjuh ruh ban ïoh ruh ban ïa shimbynta ha ka lyngpung kaba heh kata ka ISL. Kumta la kyntu ruh kum ki ‘rangïalehkai ba ki dei ban kynmaw ban kiar rai eh rai dam ba kim dei ban ngop ha ki jingdih kiba pynbuaid namar u shait ïohi ba ki ‘rangïalehkai ynda ki la sdang ban kiew ki la sdang ban ngop noh ha kine ki jingdih pynbuaid, namarkatta, kane ka pynlong ïa ki ba kim nym poi shuh sha ka thong, bad ba kin kut noh tang ha ki jingïalehkai hapoh ki shnong ki thaw, ong u bah Balse.
U la ong ba ha kane ka juk hiran kam hiran jam, ba wat ki samla ba la-nang la-stad ruh ki ïoh kam ïoh jam, namarkata dang ha kine ki khyndiat sngi kata ha ka 28 tarik Risaw, 2022 ka FKJGP Central Body ka dang pynlong ïa ka rally ban pynsngew halor ka jingeh jong ki samla khamtam ban dawa na sorkar ban thung noh ïa ki post kiba lait ïa ka ba ka sorkar ka la shu leh mynthi ban shu ieh kumto ïa ki. Kumta u la ong ba kum ki samla kiba don ka sap ka phong ïa kaba U Blei U la ai ha ki ïa ki kam ïalehkai ba ki dei pyndonkam hok ïa ka bad ban trei shitom haduh ba kin da poi ha ka thong, “namar tang kiba trei shitom kin ïoh ïa ka jingangnud”, u la ong. Ha kajuh ka por u bah Balse u ai khublei ruh ïa ki paidbah kiba la wan sa khie lang ha kane ka sngi bad ïa baroh ki ‘riew rangbah jong ka shnong ka thaw ki dkhot jong ka FKJGP Mawpud Area Unit.
Haba ai jingkren u lyngkot Myntri Shnong ka Lower Mawpud, bah S. Basan u la ai khublei ïa ka FKJGP kaba la pynlong ïa kane ka lympung ïalehkai bad u kyntu ruh ba kum u rangbah un dang ïai ai mynsiem shuh ïa ka seng ba kan nang lah shuh ban long ïa kum kine ki jait jingïalehkai bapher bapher bad khamtam ban kyntiew ïa ka kam ïalehkai kynjatbol hapoh ka dong ka thaiñ.
Kiwei pat kiba ïadonlang ki long u Secretary Shnong Mawpud, bah A. Wanniang, u President ka FKJGP Mawpud Area Unit, bah Raynol Thongni, bad u bah Phremson Thongni, President ka FKJGP Langrin Circle. Ha kane ka sngi la ïoh ruh ban pynlong ïa ka jingïalang ba lyngkot ba la pyniaid da u bah Arban Wanniang, General Secretary ka seng.