Shillong, Ïaiong 07: Ka Sorkar Jylla kala kurup ïa palat 50000 metric ton u dewiong na East Jaiñtia Hills ha kine ki lai taiew bala lah namar ka jingshem ba u dei uba tih be-aiñ.
Napdeng une u dewiong, haduh 45000 metric ton la shem ba u dei uba be-aiñ katba 5000 metric ton u dei u dew iong bala dep pynbna (declared), pyntip ki tyllong khubor.
Na ka liang ki bor District kila phah ïa ka kaiphod sha ka District Court halor une u dewiong na ka bynta ban die lilam noh ïa u.
Ha ka 22 tarik Lber, ki bor District ka East Jaiñtia Hills kila maham ïa kano kano ka kam ba ïadei bad ka jingtih dewiong, pyllang be-aiñ, ban leit theh ïa u dewiong ha kino kino ki bynta jong ka District. Kala khang ruh ïa ka jing shalan ïa u dewiong na ka District sha kiwei kiwei ki jaka hapoh ka District ne shabar.
Kane ka hukum kala mih hadien ka jingkynnoh ba ka dang don ka jingtih be-aiñ ïa u dewiong bad jingkhaii ha kylleng ki jaka hapoh ka District.
Kano kano ka jingtih dewiong lane jingkhaii khlem da ïoh jingbit ïa u dewiong ka dei kaba la kheiñ be-aiñ da ka hukum jong ka Ïingkashari Supreme Court ka Ri India bad ka National Green Tribunal (NGT).
Ki bor District kila sdang ïa ka jingtohkit ban pynthikna ïa u dewiong bala theh ha kylleng ki jaka hapoh ka District la u dei uba be-aiñ ne em bad kila kurup ruh ïa uba be-aiñ hadien ba ka Ïingkashari Meghalaya High Court kala sei madan ïa ka jingjur ka jingtih be-aiñ ïa u dewiong hapoh ka District.
Ha ka hukum ba pynmih ha ka 7 tarik Lber, ka Full Bench jong ka Ïingkashari Meghalaya High Court kala ong ba kam lah long ba kum kane ka kam kan jia khlem ka jingiadon bynta lang jong ki bor pynïaid ka District.
Ka Ïingkashari kala sei madan ïa ka jingjur ka jingtih be-aiñ ïa u dewiong hadien ka jinghiar jurip jong u Chief Justice Sanjib Barnerjee, Justice HS Thangkhiew bad Justice W Diengdoh sha Khliehriat bad kiwei kiwei ki jaka ha u bnai bala lah.
“Kala paw shai wat haba ïaid lynti naka Highway ïa ka jingdon u dewiong ba dang shu tih thymmai, bala pyllang ha baroh arliang jong ka surok ha ka jingjngai ba da ki phew kilometer. Lada peit hi ikop ba u dewiong u dei uba dang shu tih thymmai bad u dang iong phyrnai bha” ong ka Ïingkashari.
