Shillong, Naiwieng 22 : Ki sengbhalang bapher bapher kynthup naduh ki seng saiñpyrthei ki la pynrem jur halor ka jingshah siat ïap jong ki 5ngut ki Khasi – Pnar ha ki pulit Assam hynne ka step ha Mukroh.
Haba pynrem ïa kane ka jingjia, ka FKJGP lyngba u General Secretary ka Seng, Bah Eldie N Lyngdoh u la ong ba kum ka Seng kin snohkti lang bad ka KSU ha ka jingdeng lama iong ha kane ka sngi Balang ban pynpaw ka jingpyrshah kaba jur halor katei ka jingjia shah thombor ki nongshong shnong ha ki pulit Assam.
“Ngi dawa na ka sorkar ba kadei ban phah kem mardor ïa kito ki pulit Assam ba siat ïa kitei ki san ngut kumba ka ju thwet ban kem ïa ki dkhot ka Seng shimiet shimet,” u la ong. Na ka liang ka Synjuk Seng Samla Shnong Seng Kmie lyngba u General Secretary Bah Ricky Pathaw u la ong ba kum ka seng ki snohkti lang bad ka Jaidbynriew baroh kawei ban pynrem jur halor katei ka jingleh riewkhlaw jong ki pulit Assam haduh ban da shim syndet haduh san tylli ki mynsiem briew.
Ha kajuh ka por na ka liang u Senior Working President jong ka UDP, Bah Bindo M Lanong da kaba pynrem halor katei ka jingjia, u la kyntu ruh ia ka Meghalaya ba kadei ban ïakhun beit khlem pyndem bad ka Assam halor katei ka mat.
Na ka liang u Bah Sanbor Shullai, MLA bad Myntri ka Sorkar Jylla u la thoh mardor sha u Myntri Rangbah ka Assam u Himanta Biswa Sarma ban shimkhia mardor halor katei ka jingjia khnang ba kan ym don shuh kano kano ka jingeh hadien habud. Ha katei ka shithi u la ong ruh ba kitei ki longiing kiba duh ïa ki ba ieit ba thoin ki dei ban ïoh ïa ka hok jong ki. U la ong ruh ba ka Meghalaya kumjuh ki nongïalam BJP ki dawa ba dei ban sospon bad kem mardor ïa kito kiba donkti ha katei ka kam.
Na ka liang u National Working President jong ka National People’s Youth Front, Bah Nickey Nongkhlaw u la ong ba ki dawa ba dei ban leh ei ei mardor ïa kito ki pulit ba donkti ha katei ka kam bymman kaba long pyrshah ïa ka hok longbriew manbriew.
Ka North East Students’ Organization (NESO) kaba dei ka kynhun jong ki seng ki samla pule ka thaiñ shatei lammihngi jong ka Ri lyngba u Chairman jong ka, Bah Samuel Jyrwa u la ong ba ki kyndit haduh katta katta halor katei ka jingjia ha Mukroh kaba don ha khappud ka Meghalaya bad Assam kaba la wanrah ïa ka jingduh ei haduh hynriew ngut ki mynsiem briew.
Da kaba phah ïa ka jingsngewlem sha baroh ki longiing kiba kynduh ïa katei ka jingjia ba sngewsih, u la ong, “Lada lah ban pynbeit noh ïa ka kam da kaba ioh noh ïa u pud u sam ba pura da kaba mynjur lang, tang kata hi kaba lah ban wallam biang ïa ka suk ka saiñ hapdeng ki jylla bad ki paidbah ha khappud kin im khlem kano kano ka jingtieng jingsmiej para ma ki.
