Nga khlem lehbeiñ ïa ka Mawhati Constituency, kiba kynthoh dei tang ki nongwad daw: Dasakhiat

Nongpoh, Naiwieng 20: Namar ki jingkynthoh kiba bun kiba mih naki paidbah ba bun ba lang ïa u Bah Dasakhiatbha Lamare MLA ka Mawhati u ba dei ruh u Myntri ka sorkar jylla, u Bah Dasakhiat u la pynshai ba kum u MLA u la leh shibun ki kam ha Mawhati Constituency, hynrei kitei ki jingkynthoh kiba mih ki dei tang ki jingwad daw kiba pyrshang ban ïalam bakla ïaki paidbah, haba kren haka jingïalang jong ki nongïalam ba hakhmat ka party NPP ha Mawlasnai.
“Kum u MLA ka thaiñ ngam ju iohthiah ioh dem ban wanwah ïaki kam pynroi naka bynta ki paidbah, naduh ki surok bapher bapher bala dep ban pyntrei khamtam ka jingurlong jong ka surok UG Road ban siang shuwa na Umsning shaduh Sonidan, ka skul Eklavya Model Residential School bad kiwei kiwei” la ong u Bah Dasakhiat.
U la ong ruh ba ngam sngew eiei ïaki jingkynthoh, hynrei kum ki paidbah kim dei ban kynthoh kulmar khlem da wad bñiah ïaki jingshisha da kaba pyrshang ban ïalam bakla ïaki paidbah jong ka Mawhati bad kumjuh ruh sha Nongkrem kumba u la thmu ban leit ïakhun noh na Nongkrem ha kane ka elekshon ban wan.
Shuh shuh u la ong ruh ba ki paidbah kim shym wad bñiah ïaki kam kiba u trei kum u nongmihkhmat jong ka Mawhati bad ka jingkynthoh ka dei beit ïaka jingsniew u surok, hynrei ïa utei u surok ba donkam tam jong ki paidbah ruh la lah ban pynurlong noh kaba dei ka jingkyrkhu kaba khraw ïaki paidbah ha kaba shen un sa leit ban iuh kjat sha Mawhati da ka Lamborghini hadien bala dep siang rong ïa u surok UG Road.