Lap ki saw seng ïa ka jingsiang rong ba torti ïa ka surok ban leit sha Nongkhnum

Nongstoiñ, Naiwieng 20: Hadien ka jingujor bad ïai ujor da ki paidbah, ki saw tylli ki sengbhalang ba kynthup ïa ka MYF, WKSU, UHM bad WYF lyngba ki nongïalam ba hakhmat duh, ha ka sngi saitjaiñ ki la leit ban jngoh dalade ïa ka rukom siang rong na shnong Mawduh jong ka thaiñ Sangriang shaduh ba don ka kshaid Weinia jong ka Dewlynnong Nongkhnum. Ha kane ka jingleit jurip da ki nongïalam, la lap ïa ka jingshisha ba ka rukom pyntrei bad siang rong ïa kane ka surok ka long kaba torti shisha bad kaba la shu leh tang dep.
Na ka liang ki nongïalam ki saw seng ba kynthup ïa u Bah Hamar Lyngkhoi President MYF, Bah D.Sun President WKSU, Bah Moon Nongrem President UHM bad Bah D.Marweiñ President ka seng WYF, ki la pynpaw ïa ka jingsngewkhia kaba jur halor ka jingtrei torti jong u Contractor u ba la ïoh ban pyntrei ïa kane ka surok kaba donkam tam ban leit sha Dewlynnong ba pawnam jong ka West Khasi Hills. Namar kumba la lap, kam I dei satia kata ka rukom siang rong, hynrei ka long pynban kumba shu tah shu tabaiñ ïa ka rong halor ki maw.
Lah ban kdew hangne ba kane ka surok ka dei kaba la pyntrei lah sahteng bad la pyrshang pyntrei la bun bun snem, ha kaba ki nongshangkai pyrthei baroh shikatta ki la hap ban ïaid ïa ka surok khyndew kaba pum pum khamtam eh ha ka por tlang. Hynrei, kaba sngewsih ka long ba mynta haba la sdang ban siang rong, pynban ka rukom siang rong ka long kaba torti sha ba palat, ha kaba lah ban khyllie ïa ka rong tang da kaba shu tyngdung da u dieng barit ruh.
“Ngi la ïohi lyngba ki dur ki dar ba la saphriang lyngba ki social media bad ngi la leit ban ïakynduh ïa u Executive Engineer ka tnad PWD, ban pyni ïa ka rukom pyntrei torti ïa kane ka surok. Te ngim tip pat la u Engineer u la leh aiu halor kane ka bynta. Hynrei na ka liang jong ngi kum ki sengbhalang ka West Khasi Hills, ngi la jurip hi dalade bad lap ba ka long kaba shisha kumba la ujor da ki paidbah nongshong shnong, ba ka jingtrei ka long kaba torti sha ba palat”, ong u Bah Hamar Lyngkhoi.
“Na ka liang jong ngi hi ki saw seng ryngkat ki paidbah jong ka dong ka thaiñ, ngi don ban dawa na u Contractor ba siang rong bad shna ïa kane ka surok, ba u dei ban sangeh shwa bad ba dei ban trei katkum ki kyndon ha kaba dei bad ka rukom ban siang rong. Namar kaei kaba ngi ïohi haba ngi peit bniah ka long ba ym shym la don kata ka rukom kaba dei ban leh, hynrei la shut ah rong jubor nalor jong ki maw kiba la saphred”.
“Ha ka jingïohi jong ngi bad ryngkat ki paidbah ka dong ka thaiñ hi baroh kawei, ngim hun satia ïa kane namar ka dei ka jingtrei kaba torti. Ngi dawa na ka tnad PWD ba ka dei ban shim ka jingkitkhlieh bad ba kin da wan jurip ïa kane ka rukom pyntrei ïa ka surok, lym kumta ngim banse ryngkat ki paidbah ban pyni bor da kaba khlong biang ïa kane ka rong ba la shu siang tang dep”, u la ong.
U la ong ruh, “Ka long kaei kaei kaba sngewsih ban tip ba hadien ba ki la don ki nongshong shnong kiba la ujor ha u Contractor ïa kane ka rukom siang rong torti. La mih pynban da ki kyntien bym sngew tynnad ban ong ba lada ki lah kita ki nongshong shnong, ai kin trei noh ma ki. Kumta ka long kaei kaei kaba sngewsih ban ïoh sngew ïa kum kita ki kyntien. Lada kita ki Contractor kim lah ban trei, kumno ki leit thep tender, namar ha ka jingshisha hi shwa ban thep tender ki la dei ban sngewthuh katno la mang tyngka na ka bynta ka jingtrei”.
“Ngi sngewkmen ha ka jingshisha ba ngi ïoh ïa ki surok ha ki shnong ki thaw jong ka thaiñ Nongstoiñ bad ha West Khasi Hills. Ka sorkar ka la mang ïa ka pisa tyngka ban trei ïa ki surok ba ki paidbah kin ïoh jingmyntoi, hynrei lada ka long kumne imat ka jingmyntoi ka kham leit khambun sha kita ki nongpyntrei. Hooid, ngi sngewthuh ba ki nongpyntrei ki dei hok ban ïoh ïa ka jingmyntoi, namar kumno kin trei lada kim ïoh jingmyntoi. Hynrei haba ngi ïohi kumne pat de, ka long kaei kaei ka bym lah ban pdiang ha ka imlang sahlang kum kane ka rukom pyntrei”, u la ban biang.
“Sa shisien pat ngi kren da kaba shai ïa u Contractor ba pyntrei siang rong ïa kane ka surok, ba lada phim trei bha ma ngi bad ki paidbah ngim banse ban hap wan khlong biang ïa kane ka rong. Ngi buh ka jingpyntip ïa u nongpeit nongjngoh u ba long u Executive Engineer ka tnad PWD, ba un sngew thuh ïa la ka jong ka kamram kumno ban leh”, ong u Bah Hamar Lyngkhoi.