Ka District thymmai ka la pynjan ïa ka Sorkar sha ki paidbah: Metbah

Mairang, Naiwieng 10: Ka Eastern West Khasi Hills District hynne ka sngi ka la ïoh ban rakhe ia ka jingdap shisnem ka jongka ha ka prokram ba la pynlong ha Madan Mot Tirot, Mairang Mission , Mairang ha kaba u Lamphang ka ïing Dorbar Thaw Ain ka jylla, u Bah Metbah Lyngdoh u la leit kum u kongsan ha ryngkat ka jingsynran lang u myntri ka tnat Water Resources ka jylla, u Bah Brolding Nongsiej uba la leit kum u symbud kongsan.
Kiwei kiwei pat kiba la iadon ryngkat ha kane ka sngi ki kynthup ïa u MDC ka Mairang-Nongkhlaw, u Bah Batskhem Ryntathiang, u MDC ka Pariong-Mawthadraishan, u Bah Jambor War, u Syiem ka Hima Nongkhlaw, u Pa’iem P.M Syiemlieh, u Syiem ka Hima Myriaw, u Pa’iem K. Syiem, u Syiem ka Hima Mawiang, u Pa’iem N. Syiem, u Deputy Commissioner ka Eastern West Khasi Hills District, u Bah W. Nongsiej, u Superintendent of Police ka District, u Bah M.B Syiem, ki ophisar jong ki tnat bapher bapher jong ka sorkar jylla, ki nongialam shnong, ki dkhot Seng Treilang (SHG) bad ki paidbah ka thain.
Ha ka jingkren ka jong u, u kongsan, u Lamphang ka ïingdorbar Thaw Ain ka jylla, u Bah Metbah Lyngdoh, haba pynpaw ïa ka jingsngewkmen ka jong u ban ïoh ïashimbynta bad ka jingrakhe ïa ka jingdap shisnem jong ka distrik, u la ong ba ka jingïoh distrik ka la long kaba seisoh namar jong ka jingkyrshan markylliang bad ka jingiatreilang da baroh ki paidbah nongshong-shnong bad u la ong shuhshuh ba ka jingrakhe ïa ka jingdap shisnem jong ka Eastern West Khasi Hills District ka pynioh ia ka lad ka kabu ban kynmaw ia ka jingtreishitom jong kito baroh kiba la pynurlong ia ka jingangnud ki paidbah ka thain ban ioh iala ka distrik ia kaba la plié ha ka 10 tarik u Naiwieng jong u snem 2021.
U Bah Metbah u la ong ruh ba ka jingthaw ïa ki distrik kiba thymmai ka long da ka jingthmu ban pynjan shuhshuh ïa ka synshar khadar sha ki paidbah nong shongshnong bad u la pynpaw ruh ïa ka jingkyrmen ban ïohi ïa ka jingkyntiew kyrdan jong ki ophis bapher bapher kiba don ha ka distrik ha ki por bad ki snem ban wan.
Haba kren halor ka jingshakri ba shitrhem jong ki nongtrei jong ki tnat treikam kiba pher bapher kiba don hapoh ka distrik, u Lamphang u la kyntu ïa ki ba kin kham trei shitom shuhshuh ha ka jingshakri jongki ia ki paidbah jong ka distrik ha ki snem ban bud.
Ha ka jingkren ka jong u, u Lamphang u la kyntu ïa baroh kiba la sakhi lang ïa ka prokram ba kin shim ïa ka jingkitkhlieh ban kyntiew kham shajrong ia ka distrik da kaba buhthong ruh ban pynlong ia ka kum ka ‘Model District’ ïa kaba kiwei pat kin kwah pyrthuh bud.
U Bah Brolding Nongsiej pat ha ka jingkren jong u, u la ong ba ka Eastern West Khasi Hills kadei ka District kaba thymmai bad ki paidbah kim pat dei ban khmih lynti than na kane ka District namar ka dang dei ban ïaid lynti bun ki jingeh. Hynrei ka sorkar ka la ïaleh katba lah ban wanrah ïa ki jingdonkam bad kita ki longj ka ophis u DC, u SP bad kumjuh ruh ka ophis DTO kaba long ka jingdonkam jong ki paidbah.
U la khot ïa ki paidbah naduh ki nongsynshar Hima, ki nongsynshar Shnong bad ki ophisar sorkar ban ïatreilang na ka bynta ka roi ka par jong ka District baroh kawei. Ha kaba ïadei pat bad ka jingkhmih lynti ki paidbah ban ïoh kam ïoh jam lyngba ka District thymmai, u MLA Mawthadraishan, u la ong ba ka sorkar kan thaw ki lad ki lad ki lynti ha ka ïoh kam ïoh jam da kaba wanrah ïa ki ophis treikam ha ka District, tangba kane kan kham shim por. “Nga kyntu ïa ki paidbah ba kin long kiba ïai shah bad ban ailad ïa ka District ba kan khie kan san”, al ong u Bah Brol.
Ha kane ka sngi, u kongsan u la ïoh ruh ban plié ia kiba bun ki projek shna surok bad u la pyllait ruh ïa ka kot lyngkdop ha kaba la thoh ïa ka jingiaid lynti jong ka distrik ha ki liang bapher bapher lyngba ka shisnem ba la leit noh naduh ba la plie ia ka ha ka 10 tarik u Naiwieng jong u snem 2021.
La pynphuh pynphieng shuhshuh ïa kane ka jingrakhe da ki jingrwai bad jingshad na ki riewdonsap ka thaiñ.
Lah ban pynkynmaw hangne ba ïa ka Eastern West Khasi Hills District la ïoh ban pynbna kum ka distrik kaba 12 jong ka jylla Meghalaya da u Myntri Rangbah ka Jylla, u Conrad K sangma ha ryngkat ka jingïadonlang kiwei de ki kynrem ki lyndan ha ka prokram kaba ishongkun ba la pynlong ha Madan Tiehpdang, Pyndeng-umiong, Mairang ha ka 10 tarik u Naiwieng mynshem snem.