Bat ka HANM, HYC bad UHM ïa ki 25 ngut ki bar jylla kynnoh ba wan rung beaiñ khlem ki kot ki sla sha ka jylla

Nongpoh, Naiwieng 06: Ki nongïalam ka HANM, HYC bad UHM na Ri Bhoi District mynta ka janmiet ki la ioh ban bat haduh 25 ngut ki bar jylla kiba la thmu ban leit sha West Khasi Hills ban leit trei bylla bad ynda la bat la lap ba kitei ki bar jylla kim don satia ïa ki kot ki sla shuwa ban rung sha kane ka jylla.
Ïa kine ki bar jylla la ioh ban bat da kitei ki nongïalam seng ha ka por 5 baje ei ei janmiet ha kaba ki la wan da kawei ka Traveler Bus kaba don ïa u number AS 25 BC-6247, kiba thmu ban leit sha Nongstoin na ka bynta ban shna ïa ka pandal ban pynlong prokram na ka bynta ka jingwan u Myntri Rangbah ka jylla.
Kumba la ïathuh da u Bah Pateng Myrsing, President ka HANM, RiBhoi, la ong ba kane ka jingioh bat ki nongïalam ka seng ïa kitei ki bar jylla, ka dei hadien ba ki la ioh jingtip ba la don haduh 25 ngut ki bar jylla kiba thmu ban wan rung sha kane ka jylla bad da ka jingap ha Umran Dairy ha kawei ka Petrol pump ki la ioh ban bat noh ïa aktei ka Bus ba la shem ruh ba la don tang ki bar jylla kiba thmu ban leit sha Nongstoin.
U la ong ruh hadien ba la ioh bat la kylli pyrthew bad la pan ruh ïa ki ki kot ki sla ba ki la ioh bor ban wan bylal sha ka jylla, hynrei kim shym la don kino kino ki kot ki sla ha kaba ki la shu kam ba ki dei kiba wan na ka jylla Assam.
“Ki nongïalam seng ki sngewlyngngoh ruh kumno ki ioh rung thik thik na Byrnihat ba la don ka Infiltration checkgate bad kane ka paw ba kam don kano kano ka jingtohkit shuwa ba kin rung sha kane ka jylla” ong u Bah Pateng Myrsing bad bynrap ruh hadien ba la ioh bat ïa kitei ki la leit aiti noh sha Umsning Police Outpost ban pynlong ïa ka jingtohkit khnang ba kum kine ki kam rung tung ban wan bylla beain sha ka jylla kin nym jia shu ha ki sngi bad ki por ban sa wan” u la bynrap.
Ha kawei ka bynta, u la ong ruh ba ki nongïalam seng nangne shakhmat kin dang peitngor ïa ka jingwan rung kynthep ki bar jylla sha kane ka jylla bad kum ka seng kan nym ailad lada kim bud katkum ki kyndon ba dei ban leh lada ki wan ban bylla sha kane ka jylla namar kane ka buh jingma ïa ka jaid bynriew jongngi, u la bynrap shuh shuh.