Shillong, Naiwieng, 04: Kumba ju long man la u snem, mynta u snem ruh ka Hima Khyrim kan sa pynlong ïa ka jinglehniam “Shad Nongkrem” ban ainguh ïa u Blei Trai Kynrad Nongbuh Nongthaw na ka bynta ban bha u khaw u kba, ban im suk im sain ka pateng pakit bad bha ka kamai kajih.
Ka Sorkar Jylla kumba long hi ka rukom mynta u snem ruh ka lah pynbna ba ka 7 tarik, Naiwieng, 2022 kan dei ka sngi shuti hapoh ka East Khasi Hills District ha kaba ki Ophis Sorkar, ki Ing Kashari bad ki jaka pule kin khang ha kane ka sngi.
Wat ka Ingbishar Meghalaya High Court ruh ka ju ai shuti ha ka sngi Shad Nongkrem kum ka jingburom ïa kane ka riti dustur ba kyrpang jong ka jaidbynriew ka jong ngi, ong u General Secretary ka HYC u Bah Roy Kupar Synrem.
“Hynrei, ngi lap bad shem pat ba don ki ophis Sorkar Pdeng, ki Ophis jong ki Kompeni shimet bad ki Bank ba kim ju burom bad ki pynlong trei lane ki plie ïa ki ophis treikam ha kiba kum kine ki sngi ba kyrpang jong ka jaidbynriew kum ka Shad Nongkrem ha kaba bunsien ki sengbhalang ki hap ban leit ban tuklar da kaba ki hap ruh ban khang khyrdep hi ïa kiba kum kine ki Ophis ne ki jaka treikam,” ong u kyrwoh na ka seng.
“Lyngba kane ka khubor na ka liang ka Seng ngi kyntu ïa baroh ki Ophis Sorkar Pdeng, ki Ophis jong ki Kompeni bapher bapher kiba don hapoh East Khasi Hills District, ki Bank bad kiwei kiwei ba kidei ban burom ïa kiba kum kine ki shuti ba kyrpang jong ka jaidbynriew bad ba kim dei ban plie ïa ki jaka trei ki jong ki khamtam ruh ha ka 7 tarik mynta u bnai,” la ong ka Seng.
Ka HYC ka kyntu ïa ki bor pynïaid jong ki Ophis, ki Kompeni bad ki Bank bapher bapher ba ki dei ban pynbna shuti ha ka 7tarik mynta u bnai hapoh ka District kumba lah pynbna da ka Sorkar bad ban ym pynbor ïa ki dkhot ka Seng.
“Lada kim buorm, ki kdhot ka seng kin hap ban leit tuklar bad khang khyrdep ïa kiba kum kine ki jaka trei ki bym burom ïa kane ka sngi ba kyrpang jong ka jaidbynriew. Ngi khmih lynti ïa ka jingïatreilang jong baroh lang,” ong u kyrwoh.
