Da ka Notification kwah ka KHADC ban ym treikam ka CPC bad CrPC ha ki Kashari District Council

Shillong, Naiwieng, 4: Ka ïingdorbar Khasi Hills Autonomous District Council mynta ka sngi ka la rai ban thoh sha ka sorkar ban ai da ka jingpynbna (Notification) kaba shai ba ki kyndon aiñ CPC bad CrPC kin ym treikam ha ki ïing bishar District Council jongka jylla bad baroh ki mukotduma ba ïadei bad ki trai ri trai muluk dei ban bishar hapoh ki ïing bishar District Council.
Haba jubab ïa ka mat jingïakren ba la wanrah da u nongïalam ka Liang Pyrshah u bah P.N Syiem ha ka dorbar tlang ba la sdang mynta ka sngi, u CEM u bah Titosstarwell Chyne u la ïathuh “ Ka Executive Committee kan ai jingthoh biang sha ka tnad District Council Affairs (DCA) bad ka sorkar ba kin ai beit da ka jingpynbna kaba shai ba kitei ki aiñ kim dei ban treikam hapoh ki ïing bishar district council.
“Ka sorkar ka dei ban ai beit da ka jingpynbna ban lait kino kino ki jingkulmar ne sngewthuh bakla hadien habud bad ba baroh ki mukotduma ïa ki trai ri trai muluk dei ban bishar da ki Kashari district council.
U CEM u la ïathuh ba mynshwa u Myntri Rangbah u la dep pynshai ba ki ïing bishar District Council kin treikam beit kat kum ba la pynkup bor ïa ki da ka para 4 bad 5 jongka Sixth Schedule kat kum ka Riti Synshar jongka ri. Hynrei ka KHADC ka ïeng haka nongrim ba dei ban ïoh da ka jingthoh kaba shai ba ka CPC bad CrPC kim dei ban treikam ha ki ïing bishar District Council.
U la ïathuh ruh ba shen yn sa plie noh ïa ki ïing bishar District Council ha Nongpoh bad Mawkyrwat bad ka jingthmu ka long ban dang pynkhlaiñ shuh shuh ïa ka bor bad iktiar jong kine ki ïing bishar.