Shillong, Naiwieng 04: U MDC ka Congress na Mawkhar-Pynthorumkhrah Constituency u Bah PN Syiem u la ong ba ha ka por ba ki nongïalam dong ka Dongkadiang, dong Lumshyiap bad nongïalam shnong ka Dorbar Shnong Nongmensong hi ki la wan sha u ban ïakren ban pynïoh ïa ki iing-dong ka la long shisha kaba eh namar um dei u MDC uba mihkhmat ïa ka Constituency ba kynthup lang ïa ka shnong Nongmensong.
Haba kren ha ka jingïalang plie ïa kane ka iing dong kaba u la pynïoh da ka jingïatreilang bad u MDC jong ka Malki-Laitumkhrah Bah Fantin J. Lakadong ha ka step sngi Thohdieng u Bah PN Syiem u la ïathuh mynba u dang long kum u Chief Executive Member (CEM) jong ka Khasi Hills Autonomous District Council (KHADDC) u la phah thoh da ka aplikeshon bad ban buddien ïa ka aplikeshon.
U la ïathuh hadien ba u la ïakren bad u Bah Fantin da ka jingïasngewthuh jingmut bad la pynïoh ïa ka mang pisa kaba 3.50 lak katba u Bah Fantin ruh u la ai T. 2 lak ban shna pyndep ïa kane ka iing-dong.
Da kaba ai khublei ïa ki trai kiba la ai sngewbha ban shna ïa kane ka iing dong, u la ong ba ka dei ka jingïatreilang kaba lah ban pynurlong ïa ki kam kata naduh ki bor shnong, ki riewrangbah bad kiwei pat kiba ïa don bynta.
“Nga la thoh Undertaking ruh ba ka ophis kan pyllait pisa ban shna ïa kane ka iing-dong bad nga la ong ba kin ot na ka tulop jong nga”, la ong u Bah PN Syiem uba la phai dien sha ka jingïakhun jong u pyrshah ïa ka jingshah sloit noh ka iktiar rangbah shnong ha ki snem kiba la dep mynba u dang long kum u CEM jong ka Council.
Na ka liang u Bah Fantin u la ïathuh ba u la shu budbeit ïa kaei kaei kaba u Bah PN Syiem u la ai jingmut kum ka jingïatreilang na ka bynta ka jingdonkam ki nongshong shnong.
Kiwei kiba la ai jingkren ki kynthup ïa u Rangbah Shnong jong ka Nongmensong u u Bah P Warjri, u Bah B Khonglah uba long u Rangbah Shnong barim, ki nongïalam dong Dongkadiang ba kynthup ïa u Bah R Kharkrang, Rangbah Dong, Bah Henry Kharmuti, Secretary uba la pynïaid jingïalang nalor kiwei pat kynthup ki nongshong shnong.
