Tied miej ki MDC ha ka jingïatai halor ka Trading Licence ïa ka Airport bad surok Four Lane

Shillong, Naiwieng 03: Ka Dorbar Tlang jong ka Khasi Hills Autonomous District Council ka la khluit hi ir bad ka mih ruh ka jingïatied miej haba ïatai ïa ka motion ba la wanrah da u MDC na Mylliem u Bah Ronnie V Lyngdoh halor ka jingai Trading License sha ki kompeni kiba pyntrei ïa ki kam pynroi ba ki trai muluk kim pat kot bor ban trei.
Ha ka jingïatai u Bah Ronnie u la ai jingmut ba ka KHADC kan pyrkhat ban kham pynsuk ïa ka jingai Trading License sha ki kompeni na bar kiba pyntrei ïa ki kam pynroi na bynta ki paidbah ka jylla kaba ki trai muluk kim pat kot bor ban leh bad ban kham pyrkhing ruh ka jingai license ïa ki lada ki pan ban leh ïa kam kiba ki trai muluk ki la lah ban trei.
Ha ka jingïatai u Bah Ronnie u la pan ruh ka jingshai la ka dei ka jingshisha halor ka jingkynnoh ba ki kontraktor bad ki kompeni ba mut pyntrei ïa ka Kad Liengsuiñ ha Umroi ba ka KHADC ka long kum kata ka nongdawa pisa bad kumjuh ruh ba ka don ka jingkynnoh ba ka kompeni ba ïoh pyntrei na bynta ban pynheh ïa ka surok na Umshypi sha Bañiun ki shah dawa pisa haduh 1 klur ban ïoh Tradieng License.
Na ka liang u Executive Member (EM) ba khmih ïa ka tnat Khaïi Pateng Bah Rangkynsai Kharbuki haba pynshai u la kyntait ba ka don kaba kum kata bad ong ba ka jingkren u MDC ka Mylliem ba ka don ka jingkynnoh ba ka KHADC ka dawa pisa na ki kontraktor ka la pynkhlemraiñ ïa u bad dawa ba un weng noh ïa kane ka jingkynnoh lym kumta un ïaid da kiwei ki lynti namar kaei kaba u Bah Ronnie u kren ka long ka jingpynlehraiñ ïa ki paidbah ka Umroi kiba la jied ïa u bad ha kane ka por u Bah Rangkynsai bad u la tied ïa ka miej dar ban pynpaw ïa ka jingdom halor kane ka jingkren u Bah Ronnie bad pan ruh ki sakhi satar ban pynskem halor kane ka jingkynnoh jong u.
Na ka liang u Bah Ronnie u la pynshai ba ka jingkren jong u kam dei ba u thew ban pynmong ne thew shimet sha u EM ne kynnoh sha ka EC hynrei u pan jingpynshai na u EM ba ka dei ne em ka jingshisha halor ka jingkynnoh dawa pisa da ka konsil. Hapdeng ka jingpynshai u Bah Ronnie u la tied ïa ka miej namar ka jingsngewdom halor ka jingpan sakhi u EM bad ka jingbyrngem shim da kiwei ki lad lada um weng ïa ka jingkren jong u halor ka jingkynnoh dawa pisa.
Kane ka jingïania hapdeng kine ki MDC la hap ban pynjai jai noh da u Dy Chairman ka KHADC bad ka jingpynshai na u Bah Titos Chyne, CEM halor ka jingai Trading License sha ki kompeni ba mut pyntrei ïa katei ka kam.
U EM u la ïathuh ruh ba na ka liang ka tnat ka la thung da ka jingtohkit halor ka jingmih la jingkynnoh kaba paw ha ki lad pathai khubor ba ki kompeni ki shah dawa pisa ban pyntrei ïa ka Kad Lengsuin ha Umroi.
Hapdeng ka jingtohkit u la ïathuh ba ym lap eiei bad ba na ka EC ka la ïakren bad ki nongpynïaid ka Kad Lengsuin Umroi bad la shem bad kam shym la don kata ka jingshah dawa pisa kumba la paw ha ki lad pathai khubor bad kaba lyngoh ba ka kompeni ba kynnoh ba ka shah dawa pisa ruh kam shym la wan ban mih hapdeng ka jingtohkit.
Haba ïadei bad ka jingai Trading License ïa ka kompeni ban pyntreikam ïa ka surok Four Lane na ka liang ka KHADC kam shym la pynslem ka jingai ïa ka license hadien ba ka la lap ba ka biang ki kot ki sla jong ka pynshai u CEM.
“Haka jingpynshai u EM ka tnat u la ong ba ka EC kala thung kynhun tohkit bad la lap ba ki jingkynnoh kim long shisha, te ka la biang, ym donkam ban sngewmong shimet bad ka rai ban weng ïa ka ktien kynnoh dawa pisa ka shong haka bor u Shongknor ka ïing ym ha ki dkhot jong ka”, ong u Bah Pynshngaiñ.