Tang ïa u ñiut ruh kim lah leh eiei, hana yn pynkylla dur ïa ka Jaiñtia Hills

Shillong, Naiwieng 01: U Bah Sambormi Lyngdoh, President ka East Jaiñtia National Council (ENJC) u la ther tyngeh ïa ki Myntri bad MLA na Jaiñtia Hills kiba shu kop bad heh tang ka ktien, katba ka kam pat kim ler.
Haba kren ha ka jingïalang hadien ba la pynlong da ki 5 Seng mynta ka sngi hadien ka jingïatur paidbah sha Secretariat, u Bah Sambormi, u la ther kham tyngeh ïa u Bah Sniawbhalang Dhar, uba la kam ba ka sorkar MDA kan pynkylla ïa ka nongbah Jowai kum ka Smart City bad ïa ka Nongkrem Constituency kum ka Model Town. Hynrei kat kane ka jingkop pynban ka Jaiñtia Hills wat tang ka jaka theh ñiut ruh kam don.
“Ki nongmihkhmat jong ngi, ki kular ïa kata ka Smart City, ka Model Town, hynrei aiu pat ki la leh ka la leh halor ka jingshlei u ñiut ha nongbah Jowai”, u la ong.
U la ther tyngeh ruh halor ka jingsahkut sah ka ïew Musiang kaba la sdang naduh mynno hynrei haduh mynta ym pat lah pyndep satia. U la ong ba naduh u snem 2016 la sdang ban shna da ka ïew thymmai, pynban kane ka kam ka shu sahkut kumjuh.
Haba phai sha ka ïoh kam ïoh kam, une u nongïalam, ula ong balei ba ki samla ki ngop ha ki jingdih ba sniew, ka daw kadei namar ba kyrduh kam kyrduh jam. “Kiba bun ki kam ki jam la knieh lut da ki briew kiba wan nabar”, u la ong.
Shuh shuh u la ong ba ka Jaiñtia Hills ki don haduh phra ne khyndai tylli ki karkhana dewbilat, hynrei sngewsih ban ïohi ba ki samla trai ri trai muluk ki ïoh tang ki kam Chaukidar bad kiwei de ki kam kiba rit, katba ïa ia ki kam kiba heh pat la ïoh da ki briew kiba nabar.
U Bah Sambormi, u la kular ruh na ka liang ka Jaiñtia Students Movement (JSM) bad ka ENJC kin trei shitom ban pyntreikam bad pynkhlaiñ ïa ka SHM ban ïakhun pyrshah ïa ka sorkar MDA.