Leit khang ka shnong bad ka KSU ïa ka khyrdop khrong khajna ka NHAI ha Pahammawleiñ.

Nongpoh, Naiwieng 01: Na ka daw ka jingbym suidñiew ïa ki bor synshar shnong bad ka jingpynibor u Manager ka Kompani ba pynïaid ban lum khajna ha Toll Plaza ha Pahammawlei, ka Dorbar Shnong bad ka KSU, Arphewmer Circle mynta ka sngi ki la leit ban pynpaw ïa ka jingpyrshah da kaba khang shipor ïa ka jinglum pisa na ki Kali paidbah bad ba la mih ka kynrum kynram haduh ba hap poi ki bor pulit ban ailad biang ïa ka Kompani ban lum khajna na ki Kali paidbah.
Na ka liang ka Dorbar Shnong Pahammawleiñ ryngkat ka KSU, Arphewmer Circle ki la leit mynta ka sngi ban pynpaw ïa ka jingpyrshah da kaba khang shipor ïa katei ka jinglum khajna na ki Kali paidbah bad ka daw kaba la pynlong ïa ki ban leh ïa kane ka kam kumba la pynpaw ka dei tang na ka jingshah kynnoh ba u Manager katei ka Kompani u burom satia ïa ki bor synshar shnong bad leh bym suidñew ïa ki kyndon ba la buh da ka shnong.
Ha kane ka jinghiar ki nongïalam ka KSU bad ka Shnong ka la don ka jingthud shipor ha ka jinglum khajna pisa na ki Kali paidbah bad dei tad haduh na la poi ki bor pulit na Byrnihat la lah ban tem noh bad la ai lad biang ban lum ïa ki Khajna pisa na ki Kali paidbah.
Kumba la ïathuh da u Rangbah Shnong ka Shnong Pahammawleiñ, u Bah Kyrmun Sylliang la ong ba kane ka Kompani bad u Manager ba pynïaid ha kaba lum pisa ïa ki kali paidbah na katei ka khyrdop khrong khajna ka NHAI kim shym la burom ha kaba ka NOC kaba la ai da ka Dorbar Shnong ka la kut noh bad haba la leit ban ïa kren ïa u Manager u la pynpaw pynban ba um donkam ïa ka NOC na ka Shnong bad la pynpaw ruh ba ka Kompani ka la dep ioh ïa ka NOC na ka ophis u Deputy Commissioner ka Ri Bhoi ba kim donkam shuh ïa ka NOC jong ka Shnong.
U la ïathuh ruh ba kane ka khyrdop khrong khajna ka NHAI ka don ha u pud u sam ka Shnong Pahammawleiñ bad kaba sngewlyngoh pat ba u Manager katei ka Kompani um ju ai ka jingïatrei lang bad u pyrshang ban ïaid lait na ki bor synshar shnong bad khamtam wat ka NOC ruh um pynthymmai shuh. Lada jia ei ei kaba sniew kaba ktah ïa ka shongsuk shongsaiñ bad ïa ka imlang ka sahlang mano ban shim ïa ka jingkitkhlieh bad dei halor kane ka jingbym burom ïa ka bor synshar shnong ka shnong ryngkat ka KSU ki la leit ban khang ïa ka jinglum khajna kum ka jingpyrshah halor kine ki jingbym burom ïa ka bor synshar shnong’ la ong u rangbah Shnong.
Na ka liang ka KSU Arphewmer Circle lyngba u President, u Bah Prince Sylliang, u la ongba ka KSU ruh ka ai ka jingkyrshan ïa ka Dorbar Shnoing halor kine ki jingbym burom katei ka Kompani ïa ka bor synshar shnong bad kum ka seng ruh ka pyrshah jur ha kaba wat la ka NOC ka la kut bad ka Kompani kam shym la shim khia ban pynthymmai kaba long ka jingibeiñ ïa ka bor shnong. Ka seng kan dang ai ka jingïatrei lang bad kan nym ailad ba ka Kompani kan leh katba ka mon ha katei ka khyrdop ba hap hapoh u pud u sam ka shnong bad kum ka seng ka maham ruh ba lada jia ei ei kaba pyrshah ïa ka shongsuk shongsain hapoh katei ka khyrdop ka Kompani ka dei hi ban shim ïa ka jingkitkhlieh, u la bynrap.