Ym hun ki paidbah ka shnong Pyndensohsham ïa ka jingpyntrei ïa ka surok PMGSY na Umpung-Pyndensohsham

Mawkyrwat, Risaw 27: Ki paidbah jong ka shnong Pyndensohsham kawei na ki shnong ba hap hapoh jong ka Ranikor Civil Sub Division, South West Khasi Hills District mynta ka sngi ha ka jingïakynduh lang jong ki paidbah nongshong shnong ki la pynpaw ïa ka jingbymhun watla hadien ba la dep ban siang rong ïa ka surok PMGSY kaba dei na Umpung sha Pyndensohsham namar ka jingpyndep jong u nongpyntrei ruh ka long kaba torti bad ym i ïa hap bad ka mang pisa.
U bah Moonking Iawphniaw, Myntri shnong jong ka Pyndensohsham haba kren ha ki lad pathai khubor, u la pynpaw ba tang namar ka jingbym shimkhia jong ki bor ba dei peit jong ka tnad surok ne PWD (R) Department wat hadien ka jingpynsngew la bun bun sien halor ka jingtorti ïa ka jingpyntrei bad siang rong ïa ka surok PMGSY kaba dei na Umpung sha Pyndensohsham. Mynta ka sngi ka 27 tarik u Risaw, 2022 da ka mynsiem jong ka sngewkhia hadien ka jingïatai hapoh ka Dorbar ba la dep, ki la ïa mih paidbah noh ban maramot hi da kaba thep da ki maw, ka khyndew ha ki jaka ba la long thliew khnang ba ki kali kin ïoh lad biang ban ïaid ban ïeng kumba ju long.
U la ong ruh ba don pat ki jaka jaka ba ka surok ka la sdang ban ngam la kumba shiteng phut ei ei bad don ruh ki jaka ba ka um ka la sdang ban bam la jan mar shipaw ïa ka surok tang na ka daw jong ka jingbym biang ki nala um hynrei wat ïa kiba kum kita ki jaka ruh na ka liang ka ophis bad ki nongpyntrei kim shym la shimkhia wat haba la pyntip bad leit ïa kynduh markhmat, “ki nongpynban hooid ngin sa leh noh”, ong u Myntri shnong.
Katba na ka liang jong u bah Farmingstar Snaitang, Secretary Shnong Pyndensohsham u la kren halor ka jingbym shimkhia jong ka ophis ryngkat ki nongpyntrei ne contractor ïa kane ka surok PMGSY namar ki don ki jaka ba la hap khyndew bad don ka jingkhang lynti ïa ka ïaid ka ïeng jong ki kali, hynrei wat haba la pyntip ruh kim patiaw ei ei. Kumta kum ki paidbah jong ka shnong kim banse ban ïa mih paidbah da ka bor met lade ban ïa khlong bad weng ïa ka khyndew ba la tuid hapdeng surok tang ban suk ka leit ka wan.
Shuh shuh u la ong ruh ba naduh ba sdang ban pyntrei ïa kane ka surok kum ka shnong hi ka don ka jingbym i hun ïa ka rukom pyntrei, hynrei ban ong ei ei ruh kam don lad don lynti namar haba leit kylli ne ujor ki ong pynban ba dei ki nongphah trei ne ki contractor ba ki ong ban leh beit ïa kaba la bthah bad kane ka jingkren jong ki ka la pyndiaw mynsiem shi katdei eh. “Ka don kawei ka jaka lei lei ba ki dang shu dep siang ïa ka rong tang ha kine ki khyndiat sngi kaba tang katto katne meter, hynrei haba peit ïa ka jingsiang ïa ka rong, bun ki paidbah ki la sakhi ba ki nongtrei ki shu theh tang u maw heh najrong ne maw saling bad sa tap noh da ka rong najrong”, ïathuh u Farmingstar Snaitang bad haba peit ïa kane la tip ruh ba tang katto katne por kan sa sniew biang bad kam neh slem namar la shu leh tang dep.
Namarkata, lyngba kane ka jingpynpaw paidbah kum ka shnong lyngba u Myntri bad Secretary Shnong ki kwah ban pynsngew ha khmat ki bor ba dei peit ba la kumno kumno dei ban trei bha ïa ka kam kumba la mang namar ka pisa ba la paw paidbah kam dei shuh ka pisa kaba dang rit hynrei ka dei kaba la heh bha bad haba pyntrei ruh dei ban trei ha kata ka rukom ba ka surok kan skhem bad neh slem khnang ba kan long ka jingmyntoi ym tang ïa ki ba ki shu wan tang shi sien lano re hynrei kan long ka jingmyntoi na ka bynta ki paidbah jong ka shnong ka thaw kiba ju pyndonkam ban ïaid ban ïeng manla ka sngi.
“Lada ki bor ba dei peit kim lah ban shimkhia hadien ba ki paidbah nongshong shnong ki la dep ban aiti ïa ki jaka ki puta ban shna bad tih surok naduh mynshwa ba ki la duh lut ïa ki mar rep bad kaba dei ruh ha ka jingmang pisa kaba heh hynrei ka jingtrei pat ka long kaba torti haduh katta katta bad ka pynpangnud ïa ki paidbah”, ki la ong bad namarkata, lada ki bor ba dei peit ki dang leh kuman halor kane ka jingpynsngew kum ka shnong baroh kawei kan hap ban shim pyrkhat da kiwei pat ki lad ki lynti khnang ba ka kam kan ïaid beit bad ka jingmyntoi jong u paidbah kan long kaba ryntih.
Kumban shu kdew ba surok na Umpung sha Pyndensohsham ka dei ka surok kaba la don lupa naduh ka por jong u bah P.K. Raswai bad ba la pyntrei kumba ar kilometer ei ei hynrei hadien la pynkylla noh ba kan dei noh ka surok PMGSY dei na Umpung sha Pyndensohsham ka don kumba 2.496 km katkum ka jingthoh ha ka signboard ha ka jingmang pisa kaba T. 278.886 Lak bad ka jingmaramot kaba san snem kynthih ka dei ha ka jingmang T. 32.951 Lak. Ïa ka tarik ban sdang ban pyntrei bad ka jingmaramot ruh kam shym la paw satia hynrei ka paw tang ki kyrteng ki nongpyntrei kata ka kong Turoilang Laloo bad ka kong Jesse Suiam ba la pyntrei lyngba ka ophis jong u Executive Engineer, PWD (R), Ranikor Civil Sub Division, West Khasi Hills District bad kaba la bei tyngka da ka Ministry of Rural Development jong ka sorkar India.