“Dei hapoh ka jingïalam jong u ka jylla ka la kiew stet ha ki kam ïalehkai”

Shillong, Risaw 26 : U Myntri Rangbah ka Jylla u Conrad K Sangma u la ïaroh ïa u Myntri badei peit ïa ka tnad ïalehkai u Bah Banteidor Lyngdoh da kaba ong ba dei hapoh ka jingïalam jong u ba ka Jylla mynta ka la kiew stet ha ka liang ki kam ïalehkai.
Ïa kane u Myntri Rangbah u la ong haba ai jingkren ha ka jingïalang pynkup burom ha State Convention Centre ïa ki nongïalehkai kiba la wanrah nam bad burom ïa ka jylla na ki lympung ïalehkai shabar na la ka jong ka ri India.
“Nga ai khublei kyrpang ïa u Myntri ki kam ïalehkai namar dei hapoh ka jingïalam jong u ba ka jylla Meghalaya ka la kiew stet ha ka liang ki kam ïalehkai hapoh ka jylla,” ong u Myntri Rangbah.
“U dei u briew uba trei shitom la ka long ha ka liang ki kam ïalehkai bad kumjuh ruh na bynta ka rep ka riang. Udei u briew uba trei shitom shisha. U ju wan ban ïakynduh ïa nga ban ïakren na bynta ban kyntiew ïa ki kam ïalehkai naduh na tynrai (grassroot level),” u la ong.
Shuh shuh u Myntri Rangbah u la ïathuh ruh ba ha kine ki saw snem shiteng shibun ki jingeh ba ka sorkar jylla ka la ïakynduh, hynrei ki jingeh ki khlem lah ban khanglad. “Ha ka jingïaid lynti ha kine ki saw snem shiteng ngi la ïakynduh shibun ki jingeh, hynrei ki jingeh ki khlem lah ban khanglad ïa ngi ba ngi la lah ban ïaid shaphrang ha ki liang baroh,” la ong u Myntri Rangbah da kaba ai khublei ïa u Myntri ryngkat ka tnad pynïaid ïalehkai ba kin nang trei shitom shuh shuh da ka jingïatylli ban nang kyntiew shuh shuh ïa ka jylla ha ka liang ki kam ïalehkai.
U la kyntu ruh ïa ki paidbah ka jylla ba kin ai ka kti kamon kti kadiang ban ïatrei lang ryngkat bad ka sorkar ban kyntiew ïa ka jylla ha ki liang baroh.