Pynkup burom u MLA ka 17 North Shillong ïa u samla Donbor Rumnong
![](https://mawphor.com/wp-content/uploads/2022/04/Sports-750x430.jpg)
Shillong, 24 Risaw : U MLA ka 17 North Shillong Konstitwensi u Bah Adelbert Nongrum u la leit ban pynkupburom ïa u Samla Donbor Rumnong hapoh ïingsah jong u ha Mawlai Nongmali.
Lah ban ong bad pynkynmaw ba ha katei ka jingleit ïalehkai kaba la long ha Vietnam u samla Donbor Rumnong u la wan balai ha ka ‘Mr.Physique’ ha ka jingïalehkai WFF Proam Championship.
Na ka liang u MLA ha ka jingleit pynkupburom u la ïaroh ïa utei u samla khamtam eh ba u dei na ka jaitbynriew Khasi uba la lah ban thaba sha kiwei ki jaka bad kane hi ka la wanrah ïa ka burom jong ka ri, ka jylla bad khamtam eh ïa ka Jaitbynriew.
“Kiwei ki jaitbynriew ki bym ju khambna eiei shaphang ka jaitbynriew Khasi jong ngi, mynta ki la tip eiei shaphang jong ka bad ka jingwanrah burom jong u Bah Donbor Rumnong kan long ka jingkyrkhu bad ka nuksa khamtam eh ïa ki samla Khasi kiba don ha ki sap bapher bapher kiba la duh jingkyrmen ba kin ïaibteng ban kynjoh sha ki kliar lum jong ka nam khnang ban kyntiew shuh shuh ïa ka Jaitbynriew Khasi jong ngi,” ong u MLA.
Haba pynpaw ïa ka jingdonkam ki lad jingkyrshan ïa kum kine ki samla na ki bor badei peit u MLA u la ong, “Ka Sorkar jylla lyngba ka tnat Sports and Youth Affairs kadei ban thaw ki lad ki lynti ban kyrshan ïa ki samla, ki hep kiba rit bad kiba la heh la San kiba don ki sap ïalehkai ba kin nang lah shuh shuh ban pynkhreh pyntbit ïalade ban nangkiew bad ïai jop ïa kiba bun ki jait jingïalehkai.”