Shillong, Risaw: U MLA ka Mawlai u Bah PT Sawkmie u la plie ïa ka ïingskul ba thymmai (kamra klas) jong ka Grace Care Academy Secondary School kaba don ha Mawlai Nongkwar, Dong Patarim (Block 11) kaba la mang na ka MLA skhim, ka Special Rural Works Programme (SRWP) jong u kaba kot sha ka 9 lak tyngka.
La sdang ïa ka prokram da ka jingduwai na u pastor P.R.Diengdoh bad la pyniphuh iphieng ïa ka sngi da jingrwai ki khynnah kane ka skul ha ka jingdon ryngkat ki heh UDP Mawlai Circle, kum u bah Wanseng Jyrwa, bah Homer Khar-kongor bad kiwei kiwei ha ka jingïalang ba la pynlong ha ka14 tarik mynta u bnai.
Haba ai jingkren u bah PT Sawkmie u la pynpaw ba da ka jingisynei U Blei ka skul Grace Care ka la ieng kumne kumba ka long. U MLA u pynpaw ïa ka jingsngewkmen ba u ïoh ban ai ïa ine i jingïarap barit sha ka skul Grace Care, ka skul kaba kiba bun ki dei kiba duk kiba wan skul.
Ha kane ka sngi la ïoh ruh ka jingkren na u bah Wanseng Jyrwa uba la pyrto ïa ki kam u MLA kaba u la leh ïa ka Nongkwar haba ïa dei bad ki kam pynroi.
La ioh ruh ia ka jingkren na u Rangbah Dong Patarim, u bah K. Sohtun uba la pynpaw ba kum u rangbah um lah ban len ba ki la ïoh jingmyntoi bah na u MLA bad u pynpaw ruh ba kat kaba ki leit ban kyrpad kim ju wan phai thylli.
“Ngim poi pyrkhat ba kane ka skul kan ïoh ïa kum kine ki jingmyntoi,” ong u bah Kordor bad u la ai khublei ia u bah PT Sawkmie, haba ïa dei bad ki kam kiba u la leh.
Ha kane ka sngi la ïoh ruh ka jingkren na ka nonghikai kong M. Nongkynrih, kaba la pdiang sngewbha bad ai khublei ïa u MLA halor ka kamra klas bad na u bah MR Jarain, secretary ka seng samla ba mihkhmat syndon ïa ka shnong Mawlai Nongkwar.
