Jowai, Risaw 20 : Shi bynta ban jurip ïa ki samla ka jylla kiba don ïa ka sap ka phong ban mih khmat sha ka Aspire Meghalaya, ïa kaba la pynlong ha kylleng ki District jong ka jylla kaba la sdang naduh ka 6 tarik u Risaw haduh u bnai Naiwieng mynta ka snem.
Ha West Jaiñtia Hills la pynlong ïa kane ka Aspire Meghalaya’s District Talent Events 2022 ha kane ka 10 tarik u Risaw ha Khimusniang Indoor Sports Halls, Jowai ha kaba la wan ban ïashim bynta haduh 21 ngut ki samla pule ki ban pyni pyrthei ïa ki sap ki phong bapher bapher ba ki don.
Ha kane ka jingjurip la jied ïa u First Colour Lathong (Musical Instruments) bad i Diangmon Sten (Art & Craft), kiba dang pule Class 12 na ka St. Dominic Higher Secondary School, Mawkyndeng bad ïa ka Wadamika Phalangki (Singing), ba pule Class 12 na Government Girls’ Higher Secondary School, Jowai ba kin leit iashim bynta sha ka Aspire Meghalaya District Stars napoh ka West Jaiñtia Hills.
Ha kane ka rynsan la pynkup burom ruh ïa ki 25 tylli ki jaka pule na ka District kiba ïashim bynta ha ka Meghalaya Youth Survey 2022 bad yn ai jingaihikai Training Soft Skills ïa ki hapoh ka Aspire Meghalaya.
La ïathuh ïa kane ka Aspire Meghalaya la pynlong shi bynta na ka jingtreikam jong ka Directorate of Sports & Youth Affairs jong ka sokar jylla bad ïa kaba la kyrshan pisa da ka State Education Mission Authority of Meghalaya (SEMAM-SSA) hapoh ka tnad pule puthi jong ka jylla.
Shuh shuh ïa ka prokram la pynïaid da ka AVENUES, Shillong hynrei haduh mynta ka snem kila don palat 64,000 ngut ki samla na ki 332 ki jaka pule kiba la wan shakhmat ban ïateh bad ka Meghalaya Youth Survey bad ki don ruh palat 13,000 ki samla pule na kylleng ki 62 tylli ki jaka pule kiba la ïoh jinghikai na kane ka prokram.
Ka jingthmu ban pynlong ïa kane ka rynsan ka long shi bynta ban jied ïa ki samla kiba don shisha ïa ka sap ka phong napoh ka jylla hi baroh kawei, haduh mynta ki don kumba 350 ngut ki samla kiba la don shisha ka sap ka phong kiba kynthup naduh ka jingrwai, ka jingshad, ka rukom pule bad kiba don sap ha ka kam ïalehkai, hynrei napdeng kiba bun la jied tang lai ngut ba mihkhmat ïa ka District jong ki.
Napdeng ki 36 ngut ki District Stars kin sa leit ïashim bynta ha ka State-level, ha kaba yn jied napdeng jong ki kum ki Top 12 sha ka State Stars. La ïathuh na ka bynta ki briew jong District Talent Committee kan kynthup lang ïa ki nongtrei na ka tnad pule puthi, ka Sports & Youth Affairs bad kiba don sap ha kum kine ki bynta.
