Wat balia palat, leh bha ïa ka Home Work shwa ban kynthoh ïa kiwei, ong u James ïa ka AITC

Shillong, Risaw 10 : U National General Secretary jong ka NPP bad Myntri sorkar ka jylla, James K Sangma ha ka sngi Nyngkong u la kyntu ïa ki nongïalam jong ka All India Trinamool Congress ba kin hap ban leh ‘homework’ bha ha shwa ba kin kynnoh ba ka party jong u kam shym lah ban pynbiang ïa ki jinglut jingsep por elekshon ha ka elekshon MLA 2018.
“Nga sngew ban ong ba ki dei ban leit bad leh homework bha shwa namar nga ngeit ba kan bha ïa kat ka kyrdan nongïalam jong ki ba kin da leh homework bha. Namar khlem da tip bha ban shu kren kumto ka long ka jingkren bym i shongnia,” u la ong haba kren bad ki lad pathai khubor.
Ïa katei ka jingkynthoh, u James u la kren hadien ba u National Spokeperson jong ka AITC, u Saket Gokhale u la kynnoh ba ka NPP ka la pynkhein ïa ka hukum jong ka Iing Bishar da ka jingbym lah jong ka ban pynbiang bad phah ïa ki jingkhein halor ki jinglut jingsep kiba ïadei bad ka elekshon MLA ha u 2018.
Hynrei haba ïadei bad kane, utei u heh NPPu la kyntait bad ong ba ka party ka la dep ban bud pyrkhing ïa ki kyndon kiba la buh da ka Election Commission of India (ECI).
“Ngi la tip ïa la ka jong ka kamram kum ka kynhun kaei kaba ngi dei ban leh bad kaei kaba ngim dei ban leh bad ngi da long husiar ruh halor kine baroh,” u la bynrap shuh shuh.