Jowai Risaw 07:Ka tnad District Planning Officer, West Jaintia Hills District, Jowai ha ka jingiatreilang bad ka State Council of Science, Technology & Environment Meghalaya kala pynlong ïa ka prokram rakhe ïa ka Wildlife Week naduh ka 1-7 tarik mynta u bnai halor ka phang pdeng “Recovering Key Species for Ecosystem Restoration”.
Haba pynkut ïa ka prokram mynta ka sngi ka sngi (7/10/2022) la pynlong ïa ka prokram ïakop dro halor ka phang “Recovering Key Species for Ecosystem Restoration” bad ka jingiakop thoh essay halor ka phang “Wildlife Conservation” ïa ki khynnah skul baher bapher kiba don ha ka nongbah Jowai kaba la sdang naduh ka por 10 baje haduh 12 baje shiteng sngi.
Ha kane hi ka juh ka sngi la pynlong ruh ïa ka prokram sam khusnam sha ki nongjop. Ïa ka jingialang la pynlong ha Training Hall jong ka ophis u Deputy Commissioner, WJH, ha kaba i kong D.D Syngai, MCS, Addl. Deputy Commissioner WJH, iba dei ruh i District Planning Oficer ila long i kongsan. Ïa ka jingialang la pynïaid da u ma P. Phawa uba dei u Asst. Research Officer ka District Planning, WJH.
I kong Syngai haba ai jingkren ila kyntu jur ïa ki khynnah bad samla pule ban long kiba don jingkit khlieh lem ban ai ka jingïada ïa ki mrad khlaw, khnang ba kim ym duh jait na kane ka snieh pyrthei. I la ong ruh ba lada ki ioh jingtip shaphang ka jingshalan beaiñ ne ka jingpynmynsaw ïa ki mrad khlaw ki dei ban ai jingtip mar sha ki bor pynïaid shnong ne sha ki bor jong ka aiñ.
Ïa ki khusnam sha ki nongjop ha ka kyrdan ba Nyngkong bad ba Ar la sam da i kongsan kong Syngai. U ma Phawa haba kren lyngkot ula ïathuh ba na ka daw jong ka jingïoh duna palat ka phon kumta ym lah ban ai ïa ka khusnam ha ka kyrdan kaba lai. Hynrei ula pynshlur pat ïa ki khynnah ban don ka mynsiem jingïakhun kampher lada jop ne rem ruh.
Kiba la ïoh khusnam ha ka jingïakop thoh Essay ki long ka Gratify Tyngkan na ka Government Girls’ HSS, Jowai ba wan ba nyngkong bad u Damebudki Garod na ka Jowai Public School ula wan ba-ar.
Ha ka jingïakop dro pat u Daminot Symblai na Jaiñtia HSS la wan ba nyngkong bad ka Isakaru Rynjah na ka Jowai Public School kala wan ba-ar.
Ki nongjop ha ka kyrdan ba nyngkong kila ïoh ïa ka song pisa ba Rs. 1000/- ryngkat bad ka Certificate katba kiwa wan ba-ar pat ki ïoh Rs.500/- ryngkat bad ka Certificate.
