Shillong, Risaw 04 : U Chief Election Commissioner u Rajiv Kumar ryngkat bad u Election Commissioner u Anup Chandra Pandey mynta ka sngi u la plie ïa ka Prokram ai jingtip na ka bynta ki nongthep vote kaba la pynlong baroh shi snem- ka Matdata Junction’ ha ka jingialang kaba la long ha Akashvani Rang Bhavan, New Delhi. Ka ‘Matdata Junction’ kadei ka radio series kaba don 52 bynta ba la pynmih da ka Election Commission of India, ha ka jingiatreilang bad ka All India Radio. Ki heh ophisar jong ka ECI, u CEO jong ka Prasar Bharati, DG AIR News bad u actor & Nongmihkhmat jong ka ECI, u Pankaj Tripathi ki la iadonlang ha kane ka jingialang.
Ha ka jingai jingkren ha ka jingïalang, u CEC Rajiv Kumar u la ong ba ka prokram Matdata Junction, ba la pynmih ha ka jingïatreilang bad ka All India Radio, kan long ka rynsan kaba khlaiñ ban pynïasoh bad ki nongthep vote ha kylleng ka ri. Ka prokram kaba donlang ki jingtip bad jingpynbyrngia, kan ïarap ban weng ïa ki jingeh ha ki jaka sor bad ai jingtip ïa ki paidbah shaphang ki kam ba iadei bad ka elekshon ha ka jingpynlong ïa ka elekshon kaba laitluid, ba shai, ba khuid, kaba don lad ïa baroh bad kaba pdiang ïa baroh ha ka rukom ai jingkren kaba plie lad ïa ka jingiamir jingmut.
Haba ai jingïaroh ïa u Pankaj Tripathi, u Actor bad nongmihkhmat ka ECI namar ka jingïadon bynta jong u bad ka ECI ban wanrah ka jingpynsngewthuh hapdeng ki nongthep vote, u CEC, Rajiv Kumar u la pynbna ba u Pankaj Tripathi, un long u nongmihkhmat ïa ka Election Commission ha kylleng ka ri da kaba kynmaw ia ka jingtrei borbah jong u sha ka kam bad ka jingkyrpad paidbah ha kylleng ka ri.
U EC Anup Chandra Pandey ha ka jingplie ïa kane ka prokram u la ong ba naduh ki por mynshuwa, ka All India Radio ka la khring ia ki briew kum ka nongiathuh khana da ki sur kiba sngewtynnad bad ka jingpynkhlain ia ka synshar paidbah. Naduh ki elekshon kiba nyngkong, ka AIR lyngba ka jingiar jong ki kam bad ka jingpoi sha baroh ki briew ka la dei ka lad ai jingtip ia ki briew ha kylleng ka ri.
Ha ka jingai jingkren jong u, u Pankaj Tripathi, u la kynmaw ïa ki por ba u dang thep vote nyngkong bad kumno kane ka la ai ïa ka hok ia u bad ruh ka kum ka sur kaba don bynta ha ka synshar paidbah. Katba u la ïaroh ïa ki sienjam ka ECI ban iajan bad ki nongthep vote, u la kyntu ïa ki samla ba kin iashim bynta ha ki kam elekshon ba kin pyni ïa ki rai jong ki bad ba kin pynïohsngew ïa la ka sur.
Ha ka jingai jingkren jong ka, ka Director General (Media), Sheyphali Sharan ka la batai bniah shaphang ka prokram – ‘Matdata Junction: Har voter ka apna station’. Ka la ong ba ka ECI & AIR kiba la pawnam namar ka jinglong khuid bad ka jingiadei bad ki briew ki la iatrei lang ban pynthikna ka jinglah ban ai jingtip sha baroh.
ïa kine ki prokram ba 15 minit yn pynmih man ka sngi Thohdieng hapdeng ka 7- 9 baje mynmiet ha ka All India Radio network kaba don 25 tylli ki FM station, 4 tylli ki FM Gold station, 42 tylli ki Vividh Bharati station, bad 159 tylli ki primary channel/local radio station ha ki 23 tylli ki ktien kiba long ka Assamese, Bengali, English, Gujarati, Hindi, Kannada, Kashmiri, Konkani, Malayalam, Manipuri, Marathi, Nepali, Oriya, Punjabi, Sanskrit, Sindhi, Tamil, Telugu, Urdu, Bodo, Santhali, Maithili bad Dogri.
Kane ka thup ki 52 tylli ki bynta kin kren shaphang ki bynta bapher bapher jong ki elekshon bad ki kam kiba ïadei bad kane na ka liang ki briew. Yn don ki bynta kiba kyrpang halor ka jingpynrung kyrteng ki nongthep vote, ka jingthep vote da ka jingtip bad da ka jingkhuid, ka jingkordor jong ka vote, ki election kiba pdiang ia baroh, ka Model Code of Conduct, ki IT Application, ki EVM, ki jingïathuh khana jong ki ophisar ba dei peit ïa ka kam elekshon, ki BLO bad kiwei kiwei. Baroh ki bynta ki don ïa ki khubor kiba thmu ban pynshlur ïa ki briew bad khamtam ki samla bad kito kiba leit thep vote nyngkong ba kin shim ïa ki rai kiba shai ha ka por elekshon. Ka thup kan long kaba ai jingtip kaba don ki drama, jingïathuh khana, Quiz, ki interview jong ki riewshemphang bad ki jingrwai ba pynmih da ka SVEEP (Systematic Voters’ Education and Electoral Participation) division jong ka Election Commission of India ha man ka bynta. Ka prokram ka don ïa ka Citizen’s Corner ha kaba ki briew ki lah ban ai jingkylli bad ai jingmut ban kham plie lad ha ki kam elekshon.
Yn don ka bynta ba nyngkong jong ka prokram halor ka phang- ‘Voter Registration’ ha ka 7 tarik Risaw, 2022 sngi Thohdieng ha ka por 7:25 mynmiet. Ki nongshong shnong ki lah ruh ban sngap ia ka prokram ha ka ‘Twitter on @airnewsalerts bad @ECISVEEP, News On AIR’ App bad ki channel YouTube jong ka ECI & All India Radio. Plie bad iashim bynta ha ka synshar paidbah kaba shitrhem jong ka ri.
