Shillong, Risaw 04 : Ka Khasi Travellers Sale Association (KTSA) ka la pynshai halor ka jingmih khubor ha ka 4 tarik Risaw ha ka kot Khubor Mawphor, ba ka Deputy Commissioner ka la ai jingbit ïa ka Association ban tah sticker ha ki kali.
U Bah Mykulbest Lyngdoh Kynshi uba dei u General Secretary ka KTSA haba ïakren bad u Mawphor u la ïathuh ba na ka liang ka DC ka khlem ai jingbit hynrei ka la mynjur ïa ka jingpynrung kyrteng.
“Ngi kwah ban pynshai ba ka DC ka khlem ai jingbit ba ngin tah sticker ha ki kali hynrei ngi la leh hi mangi na ka liang ka Association, ka DC ka la mynjur ïa ka jingpynrung kyrteng ban ithuh noh ïangi kum kawei na ki Association,” ong u Bah Mykulbest.
Kum ban pynkynmaw hangne ba ka kynhun ki nongdie tiar kiba ju leit shang tyrwa ha kylleng ki shnong ki thaw hapoh ka jylla, ki la thaw noh da ka synjuk ki nongdie tiar ka Khasi Travellers Sale Association khnang ban ïarap ban kyntiew ïa kito kiba ju im jakpoh da katei ka kam bad ba kan long shngaiñ ha ka leit ka wan, bad ka synjuk kan pynbiang ruh da ki ID khnang na bynta jong ki ba kin ym shah tharai sniew ha ki paidbah nongshong shnong ha kiba kum kane ka por jong ki jingsniew kiba bunjait haba ki leit ban die tiar.
