Nongpoh, Risaw 03: Ka Eastern Ri Bhoi College Bhoirymbong ha ka jing pynïaid ka Principal, ka Samla Iaishah Nylla Rymbai lem bad ki nonghikai ki la sdang ïa ka college week ha ka 27 tarik u Nailur bad ïa kane ka College week la pynkut noh ha ka 1 tarik u Risaw 2022 da ki prokram bapher bapher.
Haba plie pyrda ïa kane ka taiew leh kmen ki samla pule la wan shim bynta da U Bah S Makdoh, ophisar na ka Bhoirymbong Block kum u kongsan bad la sakhi lang ruh da ka jingdon U Dr. Vincent Nianglang, u nongseng ïa kane ka college, u Bah Albinus Lyngdoh, Ex MDC Umroi constituency bad kiwei kiwei ki riew rangbah. Ha kane ka sngi la don bun ki jing ïalehkai sport kum ki jingialehkai phutbol, iatan tyllai (tug of war), Relay, Long Jump,Sack Race, 200 & 100 metre race bad kiwei kiwei ki jingiakop.
Haba pynhap pyrda noh ïa kane ka taiew lehkmen ki samla pule, la wan shim bynta da u Bah P N Syiem, MDC ka Mawsynram kum u kongsan bad la sakhi lang da ka jingdon ryngkat ki Rangbah shnong , secretary shnong jong ka Lumdaitkhla Bhoirymbong pyllun.Ha kane ka sngi la don ki jingïalehkai kum ka ïakop pyni riam bad la don ruh ka jing jied Mr and Ms Eastern Ribhoi College. Ki don ruh ki Dancing , Singing bad Quiz competition.
Ïa kane ka college la seng ha u snem 2000 bad kane ka college ka la ïarap ïa shibun ki khynnah ki ba duh lat ki ba duk ba kyrduh ki bym ioh lad ban leit pule sha sor Shillong.
