Pynkup burom kyrpang ka Jowai Civil Hospital BBC ïa ki nongsynñiang snam ba man ka por
Kiew ka jingsynñiang snam ha Blood Bank Centre, Jowai

Jowai, Risaw 02: Ka Jowai Civil Hospital Blood Bank Centre, ha kane ka sngi saitjaiñ kala ïasnohkti lang bad ka ri hi baroh kawei ban leh burom ïaka ‘National Voluntary Blood Donation Day’ kaba la juleh manla ka 1 tarik u Risaw, da kaba pynlong ïa ka jingpynkup burom ba kyrpang ïa ki nongsynñiang haka jingïalang kaba la long ha Conference Room jong ka Blood Bank Centre, Jowai.
Ïa kane ka prokarm la pynlong da ha ryngkat ka jingïatreilang bad ka Meghalaya AIDS Control Society, Shillong (MACS) bad ka National Health Mission (Meghalaya) NHM halor ka phang kaba ong “Donating Blood is an Act of Solidarity Joint Efforts and Save Lives”.
Ha kane ka sngi u MLA ka 2-Jowai Constituency u ma Wailadmiki Shylla ula long kum u kongsan ha ryngkat ka jingdonlang ka Dr. Rita Pohrmen, Medical Superintendent, Ialong Civil Hospital, Dr. Ramanand Prasad, Occupational Health Centre Dalmia Bharat Ltd, Dr. P. Shylla, Senior Doctor, Incharge Jowai Civil Hospital Blood Centre, Panaliar, Jowai bad kumjuh ki nong synñiang snam.
Na ka liang u ma Wailad Shylla haba ai jingkren ula ïaroh ïa kitei ki nongsynñiang snam kiba la ai ïa ka snam manla ka por, ha kaba ula pynkymmaw ba ka snam ka long kaba donkam eh na ka bynta kito kiba donkam kyrkieh ïa ka, kumta u buh ka jingkyntu ba kin nang ïai bteng ïa kane ka kam synñiang snam hapoh kane ka jaka kynshew snam.
U kyntu ruh ïa ki nongtrei kane ka jaka kynshew snam ba kin ai jingtip sha kiwei de halor kajingdonkam jong ka jingsynñiang snam naduh ki khynnah skul, ki samla pule bad ïa ki paidbah nongshong shnong kumjuh.
Ka Dr. R. Pohrmen, Medical Superintendent, Civil Hospital Ialong ha ka jingkren kala ai khublei ïa kitei ki nong synñiang snam kiba la don ka mynsiem ban ïarap kylliang ïa kiwei namar ka snam ka long kaba donkam eh ha ka jingim jong u briew. ha ka juh ka por kala pynsngew ba ka jingai snem ka ai ruh ka jingkoit jingkhiah ïa u ne/ka nongai snam.
Kala pyntip ruh ba ka Jowai Blood Bank Centre da ha une u bnai ba la dep haka 17th September, 2022, kala ïasnohkti lang haka Mega Voluntary Blood Donation Drive – Raktdean Amrit Mahotsav da kaba pynlong ïa ka ‘Blood Donation drive and awareness program’ ha WK Woodland Hospital, Sabamuwang.
Katba na ka liang ka Dr. P. Shylla, incharge ka Jowai Blood Centre kala ai khublei kyrpang ïa kitei ki nongsynñiang snam kiba la kyrshan bor bah na ka por sha ka por ïa kane ka jaka kynshew snem ka Blood Bank Centre Jowai kaba don ha Panaliar.
Kala batai ruh ïa ka jingïoh lum jingkheiñ ka jingkynshew snem ha Blood Bank Centre naduh u snem 2014 haduh mynta u snem 2022 kiba long kumne ha ka snem 2014 – la ïoh kynshew haduh 167 (67 kiba synñiang (Voluntary) bad 100 kiba ai kylliang (replacement), ha u snem 2015: la ïoh lum 338 (66 kiba synñiang bad 272 kiba kylliang, ha u snem 2016 la ïoh lum 354 (103 ba synñiang bad 251 kiba kylliang), ha ka snem 2017 la ïoh lum 696 (234 kiba synñiang bad 462 kiba kylliang), ha ka snam 2018 la ïoh lum 885 (219 kiba synñiang bad 666 kiba kylliang), ha ka snem 2019– la ïoh lum 801 (185 kiba synñiang bad 616 kiba kylliangt), ha ka snem 2020 la ioh lum 871 (244 kiba synñiang bad 627 kiba kylliang), ha ka snem 2021: la ïoh lum 1057 (290 kiba synñiang bad 767 kiba kylliang), katba mynta ka snem 2022 (haduh u bnai September) la ïoh lum haduh 1046 (331 kiba synñiang bad 715 kiba ai kylliang)
Ïa ka jingïalang ha kane ka sngi la pynïaid da ka samla Ianehskem Najiar, Data Entry Operator, Jowai Blood Bank, la don ruh ka jingrwai kyrpang na ki nongtrei ka Blood Bank bad ki kyntien ai khublei la ïoh na u ma William Sumer, Lab Technician.