Nongpoh, Risaw 02: Ban kynmaw burom ïa ka lyngkhuh sngi kha jong u Kpa ka Jaid Bynriew, u Mahatma Gandhi ba la ju rakhe man la u snem ha ka 2 tarik u Risaw, ka Seng Samla Mynri-Umsning ka la pynlong ïa ka jingrakhe da kaba pynlong ïa ka jingpynkhuid shnong ha baroh ki bynta bad ki sawdong sawkun jong ka Shnong Mynri Umsning.
Kane ka jingrakhe ïa ka lyngkhuh sngi kha u Mahatma Gandhi la pynlong hynin ka sngi Saitjaiñ ha kaba la ïalam da President ka seng Samla, u Samla Everson Sumer, Publicity Secretary, Jameson Nongrum bad kiwei kiwei ki nongïalam ka seng Samla Shnong Mynri-Umsning. Ha kane ka jingpyn khuid shnong la shim bynta ruh naduh ki Seng Kynthei ka Shnong Mynri-Umsning, ki SHG ba don hapoh ka shnong, ki paidbah nongshong shnong bad kynthup kiwei kiwei ki riew rangbah kiba la kyrshan ïa ka seng samla halor kane ka jingrakhe ïa ka lyngkhuh sngi kha u Mahatma Gandhi da kaba wan rah ïa ka khuid ka suba hapoh ka shnong ka thaw.
Ha ka jingïalam ki khun samla bad da ka jingïasnoh kti lang ki Longkmie bad ki paidbah la lah ban pynkhuid ïa ki sawdong sawkun jong ka shnong ka thaw kaba dei shi bynta ban wan rah ïa ka khuid ka suba hapoh ka shnong ka thaw. Ka seng Samla Shnong Mynri-Umsning ha kane ka sngi nalor ba la lah ban pynkhuid ïa ki surok shnong bad ki kyndong kynshrot jong ka shnong, shi bynta ban wan rah ïa ka khuid ka suba ki la buhr uh da ki jaka theh ñiut (Dusbin) ha man la ki dong jong ka shnong ban kyntu ïa ki paidbah nongshong shnong ban ïa trei lang na ka bynta ban pynlong ïa ka shnong kaba khuid.
Na ka liang u President ka seng samla, u Samla Everson Sumer bad u Publicity secretary, u samla Jameson Nongrum ki la ai ruh ka jingkhublei kaba kyrpang sha baroh ki longkmie, ki longkpa, ki samla bad ki paidbah kiba la ïa snoh kti lang ha kane ka sngi bad ki kyntu ruh ba nangne shakhmat kin don kata ka jingïatrei lang ym tang ban wan rah ïa ka khuid ka suba hapoh ka shnong ka thaw, hynrei ban ïa trei lang ruh na ka bynta kiwei kiwei ki kam kiba bha hapoh ka imlang ka sahlang.
