Sdang ka jinglehñiam Puja, da ka pisa ïarap u MLA Nongpoh

Nongpoh, Nailur 03: Ka lehñiam puja jong ki paid riew ngeit Hindu kala sdang ha ka ri baroh kawei bad naka liang ka Shree Shree Maa Kali Mandir Committee mynta ka sngi kala sdang ïaka lehñiam ryngkat ki rong ki rup ban pynitynnad ha Nongpoh.
Ha katei ka lehñiam Puja naka liang u MLA ka Nongpoh u Bah Mayral Born Syiem mynta ka sngi u la leit ban ai mynsiem bad pynshngaiñ ïaki paid riew ngeit Hindu ha Shree Shree Maa Kali Mandir bad ioh ruh ban ïarap da ka pisa kum ka jingdon bynta lang bad katei ka lehñiam puja.
La sakhi ruh ha katei ka sngi da ka jingdonlang u Bah Balajied Ranee MDC ka Nongpoh, Bah S Mynsong Rangbah Shnong bad kiwei kiwei ki nongïalam shnong.
Naka liang u Bah Mayral Born Syiem haba kren ha katei ka sngi u la ai mynsiem ïaki paid riew ngeit Hindu da ka jingkyrmen ba kane ka Puja kan wanrah ka jingkmen bad ka jingkyrmen ïa baroh ki paid riew ngeit Hindu tad haduh ba kan da kut hapdeng ka jingsuk bad ka jingphuh jingphieng.