Imat donkti lang u Myntri Rangbah ha ka jingpyndonkam bakla ïa ka pisa: Egenstar Kurkalang

Shillong, Nailur 29 : U Bah Egenstar Kurkalang uwei na ki nongtrei mon sngewbha u la ong ba wat u Myntri Rangbah ka jylla u Conrad K Sangma u la ban donkti lang ha ka jingpyndonkam bakla ka tnad Printing and Stationery ïa ka pisa kaba kot sha ka 2 klur tyngka.
U Bah Egenstar Kurkalang kum uwei na ki nongshong shnong bad u nongtrei mon sngewbha hapoh ka jylla u la mih shakhmat ban pynpaw ka jingpyrshah halor ka jingleh jong ka sorkar MDA hapoh ka jingïalam ka NPP da kaba ong ba kadei ka sorkar kaba leh shilliang khmat tang ban myntoi shimet la ka long ha kino kino ki kam.
Haba kren sha ki lad pathai khubor ha ka sngi Palei u Bah Egenstar Kurlang uba dei ruh u nongpule aiñ u la ïathuh ba halor katei ka kynrum kynram kaba la mih hapoh jong katei ka tnad sorkar la dep ban thung ïa ka kynhun tohkit hynrei haduh mynta ka sorkar ka khlem sospon ïa u Director.
“Ka jingtohkit halor ka kynrum kynram pyndonkam bakla ïa ka pisa kaba wan lyngba ka NHM la dep ban thung bad ba la khlieh da ka Commissioner Secretary ka kong Ripna hynrei haduh mynta mynne ruh ka sorkar kam shym la leh eiei ïa u SR Marak uba dei u Director uba dang bteng beit ban bat ïa ka kam,” u la ong.
“Ka jingtohkit aiu kaba lah ban rung haba u Director u dang bat ïa ka kam.”
Utei u samla rangbah u la ïathuh ruh ba ym tang ba ki pyndonkam bakla ïa ka pisa hynrei wat ïa ka bor da kaba pynkheiñ ïa ki kyndon jong ka service rules. “Ym tang ba ka pyndonkam bakla tang ïa ka pisa hynrei wat ïa ka bor ha kaba ki la pynkheiñ ïa ki kyndon treikam ha kaba kim shym la bud ïa ka tender katkum ki kyndon treikam bad kaba lyngngoh ba haduh mynta ka tnad bad ka sorkar ka khlem shim kam eiei ruh em halor katei ka kynrum kynram,” la ong u Bah Egenstar.
U la ther tyngeh ruh ïa ka sorkar MDA da kaba ong ba kane ka sorkar hapoh ka jingïalam u Conrad K Sangma ba ka leh shiliang khmat ha kaba ka kloi ban pynshitom ïa kiwei lada ki leh bakla hynrei ïa ki briew lajong kam leh eiei. “Lada ïa kiwei ki ophisar tang shu bakla tiak wut wut ki shimkam ban pynshitom da kaba sospon hynrei balei ïaune uwei pat?. Kane kadei ruh ka jingibeiñ ïa ka jait bynriew Khasi bad kane ka jingleh imat wat u Myntri Rangbah ruh u donkti lang ha katei ka kam,” ong shuh shuh u Bah Egenstar.
Na ka liang u Bah Egenstar Kurkalang u khot bad wer ïa ki paidbah nongshong shnong ka jylla kynthup ruh ïa ki seng bhalang bad dawa ruh ïa ka tnad bad ka sorkar ka ban shimkhia halor kane ka kam khnang ba ki briew sorkar kin ym ïoh ban leh katba mon khamtam ïa ka pisa paidbah.