Shillong,Nailur 29 : Ka jingwan ïuhkjat jong u heh duh ka Rashtriya Swayamsevak Sangh (RSS) u Mohan Bhagwat ha kane ka taiew ba la dep ha nongbah Shillong bad ban ong “ba baroh ki nongshongshnong jong ka jylla Meghalaya ki dei ki Hindu namar ba ki im ha pneh ka Mei India” (Bharat Mata) ka long kumba u tynruh ha ka skum jong u dkhewïong.
Baroh ngi tip kaei ka RSS. La seng ïa ka ha ka 27 th September 1925 bad la ong ba haduh mynta, ki dkhot jong ka ki la kynjoh sha ka 5-6 million bad ki tnad (shakhas) ki don haduh 56,859 tylli. Ïa ka RSS la kheiñ beaiñ (banned) nyngkong da ka sorkar British, nangta, la kheiñ beaiñ biang laisien da ka sorkar India hadien ka jingïohlaitluid, nyngkong ha ka snem 1948 hadien ba u shongshit niam Hindu bad u dkhot ka RSS u Nathuram Godse u la siat ïap ïa u Mahatma Gandhi, nangta ha ka por ka synshar Emergency (1975-77) da ka Indira Gandhi bad ka sien balai pat ha ka snem 1992 hadien ka jingpynjot ïa ka Babri Masjid ha Ayodhya. Ka ïalap ïa ka Hindutva bad ka kynthup ïa baroh ki jait sengrit hapoh kata ka Sangh Parivaar kynthup ïa ka Bajrang Dal. Ka im, ka hikai ïa ka hindu idoelogy da kaba phah skul bad phah training naduh ki khynnah rit haduh kiba la heh la san. Sha kiwei ki jylla, dei katei ka seng shongshitniam ki Hindu ba niom beiñ ïa kiwei pat ki nongshongshnong bym dei Hindu, kata kum ki Khristan ha Gujarat,Odisha (Orissa) ,Karnataka bad hawei. Hynrei,u Mohan hangne pat u kren sian bha da kaba ong ka Hindu ka kynthup lut ïa baroh ki jait jingngeit. U kren ba u dei u Constitutional head jong ka State. Lada ka dei ha kata ka rukom ba u lah ban pdiang ïa kiwei pat, balei ki mih jingkynshoit ban thombor bad pynjot ïa ki jaka maneblei jong kiwei pat ki jait niam ha India ?.
Ka jingthmu ban pynurlong ïa ka Uniform Civil Code (UCC) ka long ban pynbna noh ba ka India kan dei ka ri jong ki Hindu. Kata; kawei ka Ri, kawei ka niam, kawei ka culture. Ngi tip bha mano ba kynshoit ïa katei ka jingmut, na shalyndet. Haba sdang ka jingshimti jong u Narendra Modi kum u Prime Minister ka la don ruh ka jingpyrshang ban weng noh wat ïa ka kyntien Secular na ka Constitution of India, kaba mut ban thew shano, namar kat kum kawei ka report la ong ba utei u rangbah u dei ruh uwei na ki Sarsanghchalak jong ka RSS. Dangshen, ka sorkar u Modi ka la weng syndon ïa ka jingrwai hymn ba sngewtynnad u Mahatma Gandhi na ka Beating Retreat Ceremony kaba ong “To shong bad nga” lane “Abide with me”, hato ba ka dei ka jingrwai jong ki khristan ?.
Lada ngi phai dien sha ka ka jingjia halor ka jingshah thangim jong u Missionary Graham Stuart Staines bad arngut ki khun ba dangrit jong u, uba trei shitom ban ïarap ïa kiba pang Leprosy (nianglyngkut) ha Mayurbhanj, Keonjhar district Orissa ha ka 23 January 1999 dei ba trei ki seng shingshit niam Hindu Bajrang Dal hapoh ka jingïalam jong u Dara Singh. Katei ka jingjia, ym tang ba ka pynpar ñiangkhriat ïa ki nongshongshnong ka ri India hynrei ka la pynlehraiñ ïa ka burom jong ka Ri, kat haduh ba u prime Minsiter Atal Behari Vajpayee u ong “ ba ka khlieh jong u ka la sdien ha kynroh jong ka Hall of Shame”.
Kum kita ki kam ki wan put turoi ïa ka jingbha ka RSS ?. Ka jingshalak khlieh jong u Bhagwat ka long ba u tip ba hangne ki bun ki khristan hynrei u la suh jingbam da u khwai baheh ban pynbieij ïa ki briew jong ngi.
Tip na ka History aïu u ïoh ba ki Khasi ki dei ki Hindu bad ki wan na ka civilization aïu ?. U Bah Hipshon Roy Kharshiing, uwei na ki ‘riewdonburom jong ka Jaidbynriew, khyndiat snem shwa ba un khlad noh u la kren ha ki katto katne ki lad pathai khubor, haba kylli u sngew kumno halor ka jingpyrshang jong ki khar Hindu ban wan biah phongrai ïa ka Seng Khasi. Utei u rangbah u la jubab da kaba ong “u khar u klieng um dei ban wan biah phongrai ïa ka Seng Khasi, namar ka jingngeit bad ka deiti jong ngi ka ïapher bak-ly-bak bad ka jong u Hindu” . U bteng ba “ngi im ha ka hok ka sot bad ka nia shi kyntien ka dei ka nia blei, ngi kamai ïa ka hok bad ngi im ha ka hok, katba u khar u lyngkien pat um salia ban kamai da ka thok, hangno keiñ ban pynïadei ïangi ?”.
Lehse, ka jingwan ïuhkjat jong u Bhagwat ha kane ka sien balai ka long ban tynjuh ïa ka bor (strength) jong ki karsevaks jong u lane ba u ïohi ba kane ka Ri Khasi ka dei ka shrah kaba seisoh na ka bynta ka Sangh Parivaar jong u. Kum ka jingpynkynmaw ha ka por ba shongshit bha ka jingïakhun Indian Idol season 3, don bun ki jingkynthoh balei ba pynriam pynbeit ïa u Amit Paul u khyllah (dkhar) da ki khor ki khriam Khasi; mynta pat la sakhi ba u Mohan Bhagwat ym tang ba u riam da ki Ryndia ne Yaplem, Jaiñspong bad u kpieng, u da leit ïuhkjat syndon ha u Lum Sohpetbneng. U nongthoh um kwah ban kynthoh ei ei hangta, sa bishar hi paidbah.
Haba phai sha kawei pat ka liang, ka jingkiew stet jong ka BJP ha India dei namar ka jingtrei shitom jong ka RSS lane kata ka Sangh Parivaar ban kaweh ïa ka lama saffron haba rieh bad haba paw. RSS wat pynbieit, u Khasi u don la ka jong ka tynrai, ka thymmei la ka dei ha ka dustur ka riti, ha ka jingngeit ne ka aijait aikynja. Ka jingkylla sha kiwei pat ki jingngeit, la khristan, Muslim, Hindu ne Buddhist ka dei ka mon ba laitluid jong u briew shimet, hynrei ka tynrai hi kam dei ka niam Hindu kumba pynkiewskong u Mahon Bhagwat. Namar u Khasi tynrai hi u ngeit ba don u simpah, u simsong, u sing karo, u ‘ïarkhiar u khun ki blei ban lam lynti ym da kito ki jingngeit jong ki Hindu.
