Iphuh iphieng ka lehkmen Diamond Jubili jong ka St. Michael’s HSS Umsning, sakhi lang u Myntri Rangbah

Nongpoh, Nailur 29: Hapdeng ka jingiphuh iphieng bad ka jinglehkmen kaba khraw naduh ki khynnah skul, ki nonghikai lem bad ki samla pule barim, ka skul St. Michael’s Higher Secondary School Umsning mynta ka sngi kala pynkut noh ïaka jinglehkmen bad rakhe ïaka jingïaid lynti u mawmer ba 60 snem (Diamond Jubilee) ka jingïaid lynti ka skul ha ka ban pynphriang ïa ka jingnang jingstad ha ka them Ri Bhoi.
Ha katei ka jingrakhe ïaka Diamond Jubili la wan ruh ban shim bynta da u Conrad K Sangma Myntri Rangbah ka jylla kum u kongsan haka wat kaba nyngkong haka por mynstep bad u Jason S Mawlong MLA ka Umsning kum u Symbud Kongsan haka jingdonlang ka Sr. Alphonsa Varghese Head Mistress ka St. Michael’s HSS, ki nonghikai lem bad ki khynnah skul bad ïaka lama jong ka Diamond Jubillee la wan pat ban pynhap da u Rev. Jimmy Marngar Chancellor ka Shillong Archdiocese kum u kongsan haka prokram kaba ar haka por janmiet haka jingdonlang u Bah Dasakhiatbha Lamare Myntri ka sorkar MDA kum u symbud kongsan, ka kong Macdalyne S Mawlong MDC ka Umsning bad kiwei kiwei ki riew rangbah.
Haba kren ha katei ka sngi naka liang u Myntri Rangbah ka jylla u Conrad Sangma la pynpaw ba kam dei kaba suk ban pyntyllun ïa katei ka skul kaba la iaid lynti ïa u mawmer ba 60 snem, shibun ki jingeh bad ki jingtynjuh ïaki bor pynïaid hynrei katei ka skul ka iengskhem ban pynphriang ïaka jingnang jingstad bad long ruh kawei naki skul ba pawnam ha Ri-Bhoi namar ka jingtrei shitom jong ki bor pynïaid kiba la seng ïaka naduh mynshuwa.
“Ka jingnang jingstad ka dei ka atiar ban wanrah ki jingkylla haka pyrthei bad ha kum kane ka juk ba mynta baroh ki treikam da ka jingstad da kaba kyntu ruh ïaki samla pule ba kidei ban minot thop haki jingpule jong ki, khnang ba kin nonglong nong wanrah jingkylla haka imlang ka sahlang bad ka jylla baroh kawei naka bynta ka jingmyntoi ki paidbah” la ong u Myntri Rangbah.
Naka liang u Conrad Sangma u la ai ruh ka jingkhublei ba kyrpang ïa katei ka skul ba kan dang kiew shaphrang ha baroh ki liang khamtam ban pynphriang ïaka jingnang jingstad ban dang sei ki khlur kiba tyngshaiñ.