Nongpoh, Nailur 29 : Shibynta ban pyninam ïaki tiar ki tar bad khamtam ki rukom treikam da kaba pyndonkam da ka jingstad saian katkum ka juk ba mynta, bad da ka jingangnud ban pynneh ïaki Riti dustur bala buh da u mynbarim ba kim dei ban duh lane jah noh, ki khynnah skul jong ka St Joseph Higher Secondary School hapdeng ka jingshongkun mynta ka sngi kila pynlong da ka Science Exhibition cum Cultural Exhibition halor ka phang Integrated Approach in Science and Technology for Sustainable Future.
Ïa katei ka program la plie pyrda mynta ka sngi da u Bah Mayral Born Syiem MLA ka Nongpoh kum u kongsan haka jingdonlang u Fr Joakim Principal ka St Joseph Higher Secondary School, Fr Glorious Syiemlieh Parish Priest ka Umden Parish, ki nonghikai lem bad ki khynnah skul.
Naka liang ki khynnah pule jong ka St. Joseph HSS kila shim bynta shitrhem ruh naduh kiba rit haduh kiba heh ban pyni ïaki model bapher bapher bala shna katkum ka jingstad saian, khamtam ban pynwandur bad pynkylla ïaki rukom treikam katkum ka juk bad ka jingïaid jong ka por lyngba ka jingstad saian bad kumjuh ruh kila pyninam ïaki rukom shad bad rwai tynrai, ki rukom thir bad thaiñ ïa u ksai ryndia, ki rukom bad kiwei kiwei bala buh da ki mynbarim.
Haba kren ha katei ka sngi kum u kongsan u Bah Mayral Born Syiem la ai ka jingïaroh ïaki khynnah skul bad kumjuh ruh ki bor pynïaid jong ka St. Joseph HSS kiba la shimkhia ban pynlong kum katei ka jait prokram kaba kyrpang ban kyntiew ïaka jingnang jingstad bad khamtam ban pyniar ïaka jngmut jingpyrkhat jong ki khynnah pule lyngba ka jingstad saian bad kumjuh ban pynneh ïa ka tynrai bad ki riti dustur.
U la ong ruh ba ka jingstad ka long kaba kongsan ban wanrah ïaki jingkylla haka pyrthei bad kum ki khynnah kim dei ban pynlut kai ïaka por hynrei ki dei ban tyngkai ban long ki khlur kiba tyngshaiñ bad ki khraw pyrkhat naka bynta ka lawei jong ka imlang ka sahlang.
