Jowai, Nailur 29: Shi bynta na ka jingrakhe ïa ka ‘Gandhi Jayanti’ na ka liang ki bor pynïaid District ka West Jaiñtia Hills kila pynbeit ban pynlong ïa ka jingpynkhuid ïew lashai ka sngi 30 tarik u Nailur ka ban sdang naduh ka por 8 baje mynstep na phyllaw ka ophis u Deputy Commissioner Office (Election).
Kumba juh long manla ka snem ïa kane ka sngi pynkhuid (Cleaning Drive) la ju leh haka 2 tarik u Risaw hynrei mynta ka snem kane ka sngi kala hap ha ka sngi U Blei kumta la pynbeit ban pynlong lashai ka sngi Thohdieng 30 tarik.
Ki jaka ban pynkhuid lashai ka sngi kin long ha baroh ki ïew kiba hap hapoh ka Dorbar Chnong Tympang Club, Jowai kiba kynthup ïa ka ïew CNI, ïew Seiñ Raij bad la ïew Shyiap Jowai.
Na ka liang u Deputy Commissioner ula buh ruh ka jingkyntu ïa baroh ki nongshong shnong, ki nongshong ïew, ki Committee ïew, ka Municipal Board kin ïashim bynta lang ha kane ka prokram (Cleaning Drive).
Khnang ba kane ka jingpynkhuid kan long kaba ïaid beit ïaid ryntih yn ym shah ïa ki kali ban ïaid NO Entry naduh ka por 8 baje mynstep haduh 11 baje mynstep, ha kaba yn shah tang ïa kito kiba donkam shisha, la pyntip ruh baroh ki jaka pynïeng kali kiba don ha ki bynta jong kitei ki ïew yn khang ïa ki hapoh kitei ki por ba la kdew.
Ha ka juh ka por u Deputy Commissioner ula pyntip ba la khang pyrshah ban wanrah ïa ki ñiut na ki ïing ki sem da kaba thmu leit theh ha ki jaka ïew haka por ba dang pynlong ka jingpynkhuid.
