Kyntu ka NHP ïa ka MePDCL ban pynkynriah ïa ki Post Electrict ha surok Nongstoiñ-Rambrai

Nongstoiñ, Nailur 29: Ka jingpyntrei ïa ka surok two lane Nongstoiñ Kyrshai ha ka wat kaba nyngkong kaba ha ka jingjngai kaba 32 kilomitar, ka la ïaid shait shait bad la khmih lynti ba hapoh une u snem yn lah ban pyndep kumba la thmu.
Watla ka jingpyntrei ïa katei ka surok ka la ïaid shait shait, hynrei ki dang don ki jaka kiba ka kompeni kaba pyntrei ka la hap ban sangeh suwa. Namar ba ki don ki eletrict polls kiba ieng ka hap ban pynkynriah namar ki don ha ki jaka pdeng ba ka surok ka dei ban ïaid. Nalor kata ki don ruh kiba ka lain jong ka surok ka tyngkhuh hajan eh bad ka khyndew ka lah ban twa kumta u poll eletrict u lah ban khyllem.
Ha kaba ïadei bad ka jingdon jong kitei ki eletrict polls, u bah Kharlesborn Nongbri President ka National Hynñiewtrep People West Khasi Hills, haba ïa kren bad u nongthoh khubor mynta ka sngi, u la ong ba na ka liang jong ka seng bad ki paitbah ka thaiñ ki da angnud bad kwah eh ïa ka Kompeni kaba pyntrei ïa katei ka surok, ba kan pynsted bad pynkloi khnang ba ki paitbah kin kham lait na ki jingeh ha ka leit ka wan ka kit ka bah bad ka kamai kajih.
Utei u nongïalam ka seng u la ong ruh ba ki la leit ban ïakynduh bad ki nongpynïaid jong katei ka Kompeni kaba pyntrei ïa katei ka surok, ban kyrpad ïa ki, ba kin ïaleh ban pynsted ïa ka jingtrei bad ban pynbeit bad ka Meghalaya Energy Corporation Limited, ba kan pynkynriah noh kham kloi ïa kitei ki eletrict polls.
Katkum ka jingïathuh jong ki nongpynïaid jong ka kompeni, la ong ba ki la dep ban ïakren bad ïa pynbneit bad ka MECL bad ka ba sah ban pynkynriah ka dei satang ha ka ophis jong ka MECL, namar ba ka Kompeni ka la pyndep ïa la ka kamram ban ïapynbeit halor katei ka kam.
Nalor kata u bah Nongbri u la ong ruh ba na ka liang ka seng ka kyntu ïa ka MECL bad ka sorkar, ba kan sngewbha ban pynkloi katba lah, namar lada pynslem ban pynkynriah, ki don ki eletrict polls kiba lada ki truk dumper ki pynhap khyndew, ki lah ban tyngkhuh ha ki sainar eletrict bad ka lah ban jia ka jingjia ba sngewsih ïa u nongñiah namar ki truck dumper ki don da ka body nar.
Nalor kata ki don ki eletrict polls kiba lah ban kyllon lada jur slap bad ka lyer namar ka jing jem jong ka khyndew. Kumta ban lait na kino kino ki jingjia ba sngewsih ka sorkar ka la dei ban bthah ïa ka MECL, ba kan pynkloi katba lah ban pynkynriah ïa baroh ki eletrict polls kiba donkam ban pynkynriah.