Shillong, Nailur 28 : Ka jylla ka don bun bha ki nongïalam radbah bad kiba skhem ka nongrim hynrei ki shah kyntait pat ha ki paidbah tang namar ba kim don pisa, ong u President jong ka HSPDP East Khasi Hills, Bah Martle N Mukhim.
Haba kren bad ki lad pathai khubor hadien ka jingïalang jong ka HSPDP East Khasi Hills, u Bah Martle u la ong, “Jan baroh ki constituency ki don ki nongïalam ba radbah bad kiba kynsai hynrei namar ba kim ïoh ban ai da kata ka pisa ne kano kano ka jingai ki shah kyntait noh sha kyndong.”
Nalorkata, u ong ruh ba ka Jaidbynriew ka don kyrhai ki nongïalam hynrei tang namar ba ki paidbah ba bun kim tip, kim sngewthuh bad kim pynleit jingmut ban jied ïa kum kitei ki briew, kumta ka paw beit ba ki paidbah ki kyntait ïa kum kitei ki briew kiba thrang shisha ban ïalam ïa ka jylla da ka rukom treikam kaba khuid ba suba.
Utei u rangbah uba dei ruh u Myntri barim ka sorkar jylla bad MDC ba mynta ka Mawkynrew u la ong , “Kane kamut ba ngi kyntait ïa ki nongïalam kaba shisha.”
Nalorkata, u ong ruh ba ha ka HSPDP watla bun ki nongïalam ki rung ki mih hynrei kim ju don daw ei ei pat pyrshah ïa ka rukom treikam jong ka party.
Haba kren pat halor ka jingpynkhreh jong ka party na East Khasi Hills, u Bah Martle u la ïathuh ba mynta ka jingwad ïa ki kyrtong ka la ïaid shakhmat bad ki khmih lynti ruh ba ha kine ki khyndiat por ban wan kin sa ïoh ban pynbna paidbah.
Na ka liang u President jong ka HSPDP, Bah KP Pangniang pat u la ong ba ki kubur ba Jaidbynriew ka duna shisha ki nongïalam kiba don ka nongrim ba shisha.
“Ka Jaidbynriew jongngi ka kyrduh palat ïa ki nongïalam kiba skhem ha ka nongrim bad ka jingshisha,” u la ong da kaba pynpaw ïa ka jingkyrmen ba khlem artatien ka party kan sa lah ban sei bun shah ki nongïalam kiba skhem nongrim ha kane ka elekshon ban wan.
U Bah Pangniang u la ong ruh ba wat hapdeng bun ki jingeh hynrei ka party kam pat ju pynthylli ïa ka shuki ha Iing Dorbar Thawaiñ ka jylla naduh ba la thaw ïa ka HSPDP.
“Ngi la lah ban sei haduh kumba 40ngut ki MLA, arngut ki MP bad kumba 60 ngut ki MDC ha kine ki 54 snem ba ka party ka don. Ngi lah ruh ban ong ba ka party kadei ka hynmen rangbah na baroh ki party kiba don ha ka jylla,” bynrap biang u President.
Katei ka party ka la rai ruh ban pyntyllun stet ïa ka jingtreikam khnang ba ka jingpynkhreh na ka bynta ka elekshon MLA kaban long ha u 2023 kan long kaba seisoh.
