Shillong Nailur 27: Ka shi kol ba la thep da u Rapborlang Makri ka la pynlong ïa ka kynhun Umeit FC, ka kynhun na Ri Bhoi District bakan ïohrah ïa ka Namlahduh ha ka lympung ïalehkai phutbol ba la tip kum ka Tirot Sing Memorial Open To All Knock Out Football Tournament ba la pynïaid da ka Khasi Student Union, Mawlai Umjaiur Unit ha madanheh minit stadium Mawlai Phudmuri ha ka sngi Baar ka 27 tarik u Nailur, 2022.
Haba phai sha ka jingïakhun final ha kane ka sngi, ha ka kyllastep ym shym la don kiba ïoh thep kol bad dei ha ka kyllamiet ba u Rapborlang u la ïoh ban pynkhih jar bad thep ïa ka namtam na ka bynta ka kynhun ha ka 51 minit ban ïohrah syndon ïa kane ka trophy mynta ka sngi.
Ka Umeit FC kum ka Lahduh ka la ïohrah ïa ka song pisa ba 30,000 tyngka ryngkat ka trophy, katba ka Mawlai Phudmuri FC ïa ka 15,000 tyngka ryngkat bad ka trophy. Ha kane ka sngi la sam ruh ïa ki khusnam shimet, ha kaba ïa ka namBest Player la ïohrah da u Wilbert Marbañiang (Jackets FC), ka nam Best Goal Keeper ka la leit sha u Kyntiewdor Lawri ñiang (Umeit FC), ka Top Scorer sha u Rapborlang Makri (Umeit FC) bad ka Pynnoh Riwar FC na South West Khasi Hills District ka la ïohrah ïa ka nam Best Discipline Team.
Ha kane ka lympung ïakhun ki la don baroh 42 tylli ki kynhun ba la shim bynta na kylleng ka district ha ka jylla.
U Bah PT Sawkmie haba kren kum u Kongsan u pynpaw ïa ka jingsngewkmen ba ka KSU Umjaiur Unit ka la pynlong ïa kane ka lympung ïalehkai kaba heh bha ban kyntiew ïa ka phutbol bad kumjuh ban ïarap ïa ki khynnah ban lait na ki jingmlien ba sniew, kum na u drok, ka kiad bad kiwei ki jait jingdih basniew.
Ha kane ka sngi la la ïoh ruh ïa ka jingkren na u samla Biangbor Paliar, President ka KSU, Mawlai Circle, na u samla Rapborlang Nongrum, General Secretary bad kiwei.
