Kyrpad u MLA Jirang ïa u Myntri Rangbah ka jylla ban pynmih da ka ‘Notification’ ban khangduh ïa ka Casino ha Ri Bhoi

Nongpoh, Nailur 24: Na ka bynta ban ai ka jingpynshai sha ki paidbah ka dong Ri Bhoi bad ha ka jylla hi baroh kawei halor ka jingpyrshah ïa ka Casino, u MLA ka Jirang Constituency u la phah syndon da ka jingthoh sha u Myntri Rangbah ka jylla ban kyrpad ba ka sorkar ka dei ban pynmih syndon da ka Notification halor ka jingpynduh noh ïa ka ka jingthmu ban wan rah ïa ka Casino ha Ri Bhoi District.
Na ka liang u Bah Sosthenes Sohtun, MLA ka Jirang haba kyrpad ïa ka sorkar ban pynmih da ka Notification halor ka jingkhang noh ban wan rah ïa ka Casino, ha ka 23 tarik u Nailur 2022, u la phah syndon da ka jingthoh sha u Myntri Rangbah ban kyrpad ba dei ban khang shi syndon ïa ka Casino bad ruh ban khang ïa ka Casino ka sorkar ka la dei ban pynmih noh da ka ‘Public Notification’ khnang ba ki paidbah kin ioh ïa ka jingshai ba pura ba ïa kane ka Casino ka sorkar ka la khang noh.
Haba ïa kren bad ki Nongthoh Khubor, u MLA ka Jirang, U Bah Sosthenes Sohtun, u la ong ba ha ka jingshisha kum u MLA katei ka thaiñ u la dep ban pyrshah naduh ba sdang hadien ba la ioh jingtip ba katei ka Casino kin wan rah hapoh u pud u sam ka Jirang Constituency bad dei namar kane ka daw u la pynbut biang da ka jingthoh ba la aiti sha u Myntri rangbah ka jylla na ka bynta ban shim khia halor kane ka bynta ka jingpyrshah ki paidbah ïa ka Casino.
U la ïathuh ruh ha ka jingshisha u Myntri Rangbah ka jylla, u Conrad K. Sangma dang shen ha ka Dorbar Synrai hapoh ka ïing Dorbar thaw aiñ ka jylla, u la dep ban kren shai ba ka sorkar kan nym pdiang shuh ïa ka Casino bad namar ba bun kiba dang artatien kum u MLA u la kyrpad ban pynmih syndon da ka ‘Notification’ khnang ba ki paidbah ha Ri Bhoi bad ha ka jylla kin ioh syndon ïa ka jingshai kaba pura ba la khang noh ïa kane ka Casino.
Shuh shuh, na ka liang jong u kum u MLA ka Jirang bad ha kajuh ka por ba katei ka Casino ba ki thmu ban wan rah ka dei hapoh u pud u sam jong ka Constituency bad na ka bynta ban pynshai paidbah kum u MLA ruh u la dep ban pyrshah bad kren sha ka sorkar ryngkat ki jingthoh ba um pdiang satia ïa katei ka Casino ba la pyrshah da ki padibah bad ban kham shai ki paidbah kan jin da la bha ba ka sorkar kan pynmih noh da ka Notification khnang ban shai kdar ba kane ka jingthmu ban wan rah ïa ka Casino kan kut noh hapoh ka jylla, u la bynrap.